गान्तोक, 11 अगस्त (हि.स.)। सिक्किमका युवाहरूलाई राष्ट्र निर्माणमा सामेल गराउने कुरामा ध्यान केन्द्रित गर्दै केन्द्रिय सञ्चार ब्यूरो र पत्र सूचना कार्यालय, गान्तोकले आज सर टाशी नामग्याल वरिष्ठ माध्यमिक विद्यालयमा दुई दिवसीय एकीकृत सञ्चार तथा आउटरिच कार्यक्रम, आईसीओपी सफलतापूर्वक आयोजन गरेको छ। नशा मुक्त भारत र हर घर तिरङ्गा विषयवस्तु अन्तर्गत आयोजित यो कार्यक्रमको उद्देश्य मुख्य सरकारी पहलहरू प्रसार गर्नु र विकसित भारत @2047 को दृष्टिकोणलाई प्रवर्द्धन गर्नु थियो। उक्त जानकारी आज पीआईबीले दिएको छ।

दोस्रो दिन विशेष अतिथि र स्रोतवक्ताको रूपमा सामेल भएका आईटीबीपी, सिक्किमका डेपुटी कमान्डेन्ट आशिष त्रिवेदीले नशा मुक्त भारत सम्बन्धी अन्तर्दृष्टिपूर्ण भाषण दिए। उनले युवाहरूमा लागूपदार्थको दुरुपयोगको बढ्दो खतरा र स्वास्थ्य, शिक्षा तथा राष्ट्र निर्माणमा यसको प्रतिकूल प्रभावमाथि प्रकाश पारे। उनले विद्यार्थीहरूलाई लागूपदार्थबाट टाढ़ा रहन र लागूपदार्थमुक्त समाजको राजदूत बन्न आग्रह गरे। उनले नशा मुक्त भारत अभियानलाई जनआन्दोलन बनाउन सामुदायिक सहभागिता, साथीहरूको सहयोग र अभिभावकीय मार्गदर्शनको महत्त्वमाथि थप जोड़ दिए।

दूरदर्शन केन्द्र, गान्तोकका कार्यक्रम कार्यकारी लेण्डुप एन भोटियाले लागूपदार्थमुक्त समाजको लागि मूल्यमा आधारित जीवनको महत्त्वमाथि बोले। स्वर्गीय डा. एपीजे अब्दुल कलामको सफलताको 5-बुँदे मन्त्र उद्धृत गर्दै उनले भने, “एक महान् उद्देश्यले युवाहरूलाई राष्ट्र निर्माणमा ध्यान केन्द्रित गर्न मद्दत गर्दछ, ज्ञान हासिल गर्नाले सूचित छनोट गर्न सक्षम बनाउँछ, कड़ा परिश्रम र दृढ़ताले साथीहरूको दबाउ विरुद्ध लचिलोपन निर्माण गर्दछ र निडरताले स्वस्थ, लागूपदार्थमुक्त जीवन बिताउने आत्मविश्वास दिन्छ।” उनले विद्यार्थीहरूलाई नशा मुक्त भारत र विकसित भारत @2047 मा सार्थक योगदान दिन यी सिद्धान्तहरू अपनाउन आग्रह गरे।

सिक्किम दिव्याङ्ग व्यक्तिहरूको समग्र क्षेत्रीय कौशल विकास, पुनर्वास र सशक्तिकरण केन्द्रकी निर्देशक श्रीमती पुष्पाञ्जली गुप्ताले राज्यभरि सीआरसीका गतिविधिहरूको सिंहावलोकन प्रस्तुत गरिन्। उनले दिव्याङ्गजनलाई स्वतन्त्र तथा सम्मानजनक जीवन बिताउन सशक्त बनाउन सीआरसीले मूल्याङ्कन, थेरापी, सहायक उपकरण, कौशल विकास तथा पुनर्वास सेवा प्रदान गर्ने जानकारी दिइन्। उनले विशेष शिक्षक, साङ्केतिक भाषा विशेषज्ञ, पेशेवर चिकित्सक र फिजियोथेरापिस्टहरूको आफ्नो टोलीको परिचय गराइन् र उनीहरूको समावेशी दृष्टिकोणले शिक्षा, जीविकोपार्जन र सामाजिक सहभागितामा पहुँच कसरी सुनिश्चित गर्छ भनेर व्याख्या गरिन्। नशा मुक्त भारतको भावनालाई जोड़ दिँदै उनले विद्यार्थीहरूलाई नशा मुक्त प्रतिज्ञा गराइन् र उनीहरूलाई स्वस्थ तथा समावेशी समाजको राजदूत बन्न आग्रह गरिन्।

टीएनएसएसएसकी प्राचार्या सरोजा प्रधानले चेस, सङ्गीत, कला, नृत्य र खेलकुद लगायत विद्यालयको सह-पाठ्यक्रम गतिविधिहरूको बारेमा बताइन्। उनले भनिन्, “शैक्षिक क्षेत्रमा रुचिको कमीको अर्थ अवसरहरूको अभाव होइन, किनकि खेलकुद र रचनात्मक कलामा प्रतिभाले सफलता, आत्मविश्वास र करियरको लागि समान मार्ग प्रदान गर्दछ।” उनले जीवन कौशल शिक्षा, मूल्यमा आधारित शिक्षा र करियर मार्गदर्शनमा विद्यालयको ध्यान केन्द्रित गर्ने कुरामा प्रकाश पारिन् र विद्यार्थीहरूलाई नशा मुक्त तथा जिम्मेवार समाजको लागि सक्रिय रूपमा भाग लिन, अनुशासित रहन र सकारात्मक छनोट गर्न आग्रह गरिन्।

प्रसिद्ध लेखक उषा शर्माले विद्यार्थीहरूलाई हानिकारक पदार्थहरूबाट टाढ़ा रहन र सकारात्मक मानसिकता निर्माण गर्न अध्ययन, पठन र अन्य उत्पादक मार्गहरूमा ध्यान केन्द्रित गर्न प्रेरित गरिन्। जारी हर घर तिरङ्गा अभियानको बारेमा बोल्दै उनले विद्यार्थीहरूलाई 17 अगस्तसम्म राष्ट्रिय झण्डा, तिरङ्गा आफ्नो घरमा ल्याउन र गर्वका साथ फहराउन आग्रह गरिन्। उनले भनिन्, “यसले स्वतन्त्रता दिवस समारोहमा देशभक्ति, एकता र गौरव जगाउनेछ र स्वतन्त्रता सेनानीहरूको बलिदानलाई श्रद्धाञ्जली अर्पण गर्नेछ।”

आईसीओपीको पहिलो दिन चर्चा, जागरूकता प्रदर्शनी, विशेषज्ञ वार्ता, एक असाधारण भाषण प्रतियोगिता र विद्यार्थीहरूलाई सामेल गराउन र जनचेतना सिर्जना गर्न खुल्ला प्रश्नोत्तरी कार्यक्रम आयोजन गरिएको थियो। गान्तोकका एसडीएम महेन्द्र छेत्रीले कार्यक्रममा मुख्य अतिथिको रूपमा उपस्थिति जनाएका थिए। टीएनएसएसएसकी प्राचार्या डा. सरोजा प्रधान विशिष्ट अतिथि थिइन्। उषा शर्मा र टीएनएसएसएसका उपाचार्य प्रेम दास छेत्री विशेष अतिथिको रूपमा उपस्थित थिए।

आईसीओपीको दोस्रो दिन कार्यक्रमको विषयमा चित्रकला प्रतियोगिता पनि आयोजन गरिएको थियो, जसमा विद्यार्थीहरूले उत्साहपूर्वक भाग लिएका थिए।

दुई दिवसीय कार्यक्रम उपस्थित विशिष्ट व्यक्तिहरूद्वारा क्विज, एक्सटेम्पोर र चित्रकला प्रतियोगिताका विजेताहरूलाई सम्मान गर्दै समापन गरियो। त्यसपछि राष्ट्रिय गीत वन्दे मातरम्को वाचन गरियो।

---------------

हिन्दुस्थान समाचार / बिशाल