काठमाडौँ, १४ अगस्त (हि.स.)। नेपालको रोल्पा जिल्लाको थबाङ गाउँपालिका, उवा कोटलबारमा गएको पैह्रोमा हालसम्म १० जनाको मृत्यु भएको छ। पुलिसका अनुसार, तीमध्ये पाँच जनाको शव घटनास्थलबाट फेला परेको छ। अन्य पाँच जनाको शव बाढीको तीव्र बहावले बगाएर प्युठान पुगेपछि फेला परेको हो। मृतकहरूमा ५ वर्षका बालकदेखि ८५ वर्षका वृद्धसम्म रहेका छन्।
कोटलबार गाउँको माथिल्लो भागमा ठूलो पैह्रो गएको छ। पैह्रोको माटो र ढुंगाको थुप्रोले गाउँका ११ वटा घर पुरिएका छन्। यस घटनामा ठूलो मानवीय क्षति भएको बताइएको छ। अझै ३ जना बेपत्ता रहेका छन् र उनीहरूको खोजी कार्य जारी छ।
पैह्रोमा परेर २२ वर्षीय हिमाल पुन मगर र २५ वर्षीय सञ्जय घर्ती घाइते भएका छन्। उनीहरूले नै राति पुलिसको आपत्कालीन नम्बर १०० मा फोन गरी घटनाको जानकारी दिएका थिए। दुवै जनाको बुटवलमा उपचार भइरहेको छ।
घटनास्थलबाट १८ वर्षीया शान्ति पुन मगर, ६० वर्षीय कमलबहादुर पुन मगर, ८० वर्षीया मनरखी पुन मगर, ७५ वर्षीय डलबहादुर पुन मगर र ८५ वर्षीया हस्तकला रोका मगरको शव बरामद गरिएको छ।
जिल्ला पुलिस कार्यालयका सूचना अधिकारी तथा पुलिस निरीक्षक कृष्ण श्रेष्ठका अनुसार, रोल्पाको लुङ्ग्री खोला र प्युठानको माडी नदीका विभिन्न स्थानबाट पनि पाँच जनाको शव फेला परेको छ।
प्युठानमा फेला परेका शवहरूको पहिचान ३८ वर्षीया जुनकुमारी पुन मगर, ५ वर्षीय अशोक पुन मगर, ८० वर्षीय बलबहादुर पुन मगर, ६६ वर्षीया मनी पुन मगर र ३४ वर्षीय महेन्द्र घर्तीका रूपमा भएको छ।
पुलिस निरीक्षक श्रेष्ठले ९ वटा घर, एक पसल, दुई गोठ र एक चर्च पूर्ण रूपमा पैह्रोको चपेटामा आएको जानकारी दिएका छन्। घटनास्थलमा राहत तथा उद्धार कार्य जारी रहेको छ।
हिन्दुस्थान समाचार / बिशाल
