गुवाहाटी, १८ अगस्त (हि.स.)। असममा आएको बाढीका कारण पाँच जिल्लाका १४७ गाउँका ३१ हजार ९१८ नागरिक अझै प्रभावित रहेका छन्। अधिकांश नदीहरूको जलस्तर सामान्य अवस्थामा फर्किएको भए पनि प्रभावित नागरिकहरू आफ्नो जीवन पुनः सामान्य बनाउन संघर्षरत छन्। यसैबीच, शिवसागर जिल्लामा थप एक व्यक्तिको शव फेला परेको छ।
मुख्यमन्त्री डा. हिमन्त बिस्व सरमाले सोमबार शिवसागर, चराइदेव, जोरहाट र गोलाघाट जिल्लाका ३१ हजार ९५१ बाढी प्रभावित परिवारका लागि अन्तरिम राहत रकम वितरण गरेका छन्। बाढी प्रभावित परिवारहरूलाई हालसम्म अन्तरिम सहयोगस्वरूप कुल १४६.२६ करोड़ रुपियाँ प्रदान गरिएको छ। मुख्यमन्त्रीले बाढी पीडितहरूलाई सामान्य जीवनमा फर्काउन आवश्यक सबै प्रकारको सहयोग उपलब्ध गराइने बताएका छन्।
असम राज्य आपदा प्रबन्धन प्राधिकरण (एएसडीएमए) का १७ अगस्तसम्मका तथ्यांकअनुसार, सबै नदीहरू अहिले खतरा स्तरभन्दा तल बगिरहेका छन्। यस अवधिमा थप एक व्यक्तिको शव फेला परेसँगै बाढीका कारण ज्यान गुमाउनेको संख्या १०६ पुगेको छ। बाढीबाट सबैभन्दा बढी क्षति शिवसागर, चराइदेव र जोरहाट जिल्लामा भएको छ।
हाल बाढीको अवस्था पाँच जिल्लामा कायम छ। प्रभावित जिल्लाहरूमा गोलाघाट, शिवसागर, नगाँव, बिश्वनाथ र जोरहाट रहेका छन्। राज्य सरकारले बाढी प्रभावित नागरिकहरूका लागि हाल पनि ११ राहत शिविर र ४ राहत वितरण केन्द्र सञ्चालनमा राखेको छ।
राहत तथा उद्धार कार्यमा एसडीआरएफ, डीडीआरएफ, पुलिस, अग्निशमन सेवा लगायतका निकायहरू सक्रिय रूपमा खटिएका छन्। यसैबीच, बाढी प्रभावित क्षेत्रमा सोमबार राज्य सरकारले ६ वटा चिकित्सकीय टोली परिचालन गरेको छ। बाढीका कारण सडक, पुल तथा अन्य पूर्वाधारमा ठूलो क्षति पुगेको जनाइएको छ।
हिन्दुस्थान समाचार / भवानी थामी
