नयाँ दिल्ली, १९ अगस्त (हि.स.)। प्रवर्तन निदेशालय (ईडी) ले उत्तर प्रदेशको रामपुरस्थित मौलाना मोहम्मद अली जौहर ट्रस्ट र मोहम्मद अली जौहर विश्वविद्यालयसँग सम्बन्धित धनशोधन मामिलामा बुधबार उत्तर प्रदेश र दिल्लीका १० स्थानमा छापा मारेको छ। ईडीको लखनउ जोनल कार्यालयले धनशोधन निवारण ऐन (पीएमएलए), २००२ को धारा १७ अन्तर्गत रामपुर, सहारनपुर र दिल्लीमा यो कारबाही गरेको हो।
ईडीको अनुसन्धान सरकारी ठेक्काबाट प्राप्त रकम कथित रूपमा निजी ठेकेदारमार्फत अन्यत्र सारिएको र पछि उक्त रकम ट्रस्ट तथा विश्वविद्यालयसँग सम्बन्धित सम्पत्ति र निर्माण कार्यमा प्रयोग गरिएको आरोपसँग सम्बन्धित छ। ईडीका अनुसार, अनुसन्धानका क्रममा केही निजी ठेकेदार र जौहर ट्रस्टबीच आर्थिक कारोबार भएको तथ्य फेला परेको छ।
अनुसन्धान एजेन्सीले यसमा कथित रूपमा ठूलो रकमको चन्दा तथा निर्माण कार्यसँग सम्बन्धित भुक्तानीसमेत समावेश रहेको जानकारी पाएको छ। एजेन्सीले ती कारोबारको स्रोत, रकमको प्रवाह र अन्तिम प्रयोगबारे अनुसन्धान गरिरहेको छ।
ईडीका टोलीहरूले वित्तीय अभिलेख, कागजात, ब्याङ्किङ कारोबार तथा डिजिटल प्रमाण संकलन गरिरहेका छन्। ईडीका अनुसार, रामपुरस्थित मौलाना मोहम्मद अली जौहर ट्रस्ट, जौहर नगर तथा मोहम्मद अली जौहर विश्वविद्यालयलाई कारबाहीको दायरामा राखिएको छ।
यसका अतिरिक्त रामपुरको सिभिल लाइन्स थाना क्षेत्रअन्तर्गत शौकत अली रोडमा इलाही मस्जिदको अगाडि रहेको एमएस ए एन्ड एस ए इन्टरप्राइजेजमा पनि तलासी लिइएको छ।
रामपुरमै ज्वाला प्यालेस, पीपल टोलास्थित एमएस सीके एसोसिएट्स प्राइभेट लिमिटेडको परिसरमा पनि ईडीले कारबाही गरेको छ। कम्पनीका निर्देशक पवन कुमार जैनको गंगापुर आवास विकास, सिभिल लाइन्स, रामपुरस्थित निवासमा पनि छापा मारिएको छ। रामपुरको जेल रोड, बाग छोटा क्षेत्रमा रहेको शाहीन खानको परिसरमा पनि अभिलेखहरू जाँच गरिएको छ।
सहारनपुरमा सीए दीपक गुप्ताको सिल्भा मार्केट, फायर स्टेसनको अगाडि, अम्बाला रोडस्थित कार्यालय तथा ग्रीन पार्क कोलोनी, दिल्ली रोडस्थित निवासमा तलासी लिइएको छ। दिल्लीमा एमएस जौहर एसोसिएट्ससँग सम्बन्धित सैयद खालिदको जसोला, जामिया नगरस्थित परिसरलाई पनि कारबाहीको दायरामा राखिएको छ।
ईडीले कथित अपराधबाट आर्जित रकमको स्रोत पत्ता लगाउनुका साथै सरकारी ठेक्काको रकम कुन माध्यमबाट निजी संस्थासम्म पुगेको र त्यसपछि उक्त रकम ट्रस्ट वा विश्वविद्यालयका गतिविधि तथा सम्पत्तिमा कथित रूपमा कसरी प्रयोग भयो भन्ने स्थापित गर्नु आफ्नो अनुसन्धानको उद्देश्य रहेको जनाएको छ।
हिन्दुस्थान समाचार / भवानी थामी
