अयोध्या, २० अगस्त (हि.स.)। श्रीराम मन्दिर भवन निर्माण समितिका अध्यक्ष नृपेन्द्र मिश्र बुधबार अयोध्या पुगे। उनी तीन दिनसम्म अयोध्यामा बसेर श्रीराम मन्दिर निर्माणसँग सम्बन्धित कार्यहरूको समीक्षा गर्नेछन्।
बुधबार साँझ निर्माण समितिको बैठक सम्पन्न भयो। त्यसपछि बिहीबार बिहान सर्किट हाउसमा पत्रकारहरूसँग कुरा गर्दै नृपेन्द्र मिश्रले राम मन्दिर परिसरमा भइरहेको निर्माण कार्यको प्रगतिबारे जानकारी दिए। उनले आगामी ३० सेप्टेम्बरसम्म राम मन्दिर परिसरका अधिकांश निर्माण कार्य पूरा हुने अपेक्षा व्यक्त गरे।
मिश्रले भने, ३० अक्टोबरसम्म एल एन्ड टी र टाटा कम्पनीका कर्मचारीहरू निर्माण कार्यबाट हट्नेछन्। त्यसपछि मुख्य रूपमा अडिटोरियम र सङ्ग्रहालयको काम मात्र जारी रहनेछ।
सङ्ग्रहालयमा कुल २० वटा ग्यालरी निर्माण भइरहेका छन्, जहाँ आधुनिक प्रविधिको प्रयोग गरिनेछ। ग्यालरी नम्बर-७ मा इमर्सिभ टेक्नोलोजीमार्फत मन्दिर परिसरको दिव्य दर्शन गराउने तयारी भइरहेको छ। ग्यालरी नम्बर-१७ मा भगवान रामको वनगमन तथा नदीहरूसँग सम्बन्धित प्रसङ्गहरू प्रविधिको माध्यमबाट प्रस्तुत गरिनेछ।
सङ्ग्रहालय निर्माणमा आईआईटी मद्रासका प्राविधिक विशेषज्ञहरूले सहयोग गरिरहेका छन्। उनले मन्दिर परिसरको चारैतर्फको पर्खाल (चहारदिवारी) दिसम्बरसम्म पूरा हुने अपेक्षा रहेको बताए। सुरक्षा उपकरण जडान गर्न थप दुई महिना लाग्नेछ।
एल एन्ड टी, टाटा, सोमपुरा लगायत निर्माण एजेन्सीहरूको भुक्तानी तथा बाँकी रहेका कार्यहरूको समीक्षा गरिएको छ, ताकि वर्षको अन्त्यसम्म निर्माणसम्बन्धी कुनै पनि काम अधुरो नरहोस्।
हिन्दुस्थान समाचार / भवानी थामी
