नयाँ दिल्ली, २० अगस्त (हि.स.)। राष्ट्रिय स्वयंसेवक संघ तथा यससँग सम्बन्धित विभिन्न संगठनहरूले असमसहित पूर्वोत्तर भारतमा गरेका कार्यमार्फत आएको सामाजिक तथा सांस्कृतिक परिवर्तनलाई समेटिएको अंग्रेजी पुस्तक ‘ग्रिट एन्ड ग्लोरी’ को २५ अगस्तमा नयाँ दिल्लीस्थित संघको मुख्यालय केशव कुञ्जमा विमोचन गरिने भएको छ।
पुस्तक विमोचन कार्यक्रममा असमका मुख्यमन्त्री डा. हिमन्त विस्व सरमा प्रमुख अतिथिका रूपमा तथा पाञ्चजन्यका सम्पादक हितेश शंकर विशिष्ट अतिथिका रूपमा सहभागी हुनेछन्।
आयोजकका अनुसार, अभिजीत जोगद्वारा लिखित उक्त पुस्तक सुरुचि प्रकाशनले प्रकाशित गरेको हो। असमका विभिन्न क्षेत्रमा सन् १९६५ देखि १९७१ सम्म राष्ट्रिय स्वयं सेवक संघका प्रचारकका रूपमा कार्य गरेका हरिभाऊ मिरासदारले पुस्तकका लागि सामग्री संकलनमा महत्वपूर्ण भूमिका निर्वाह गरेका छन्। उनले राज्यका विभिन्न स्थानमा कम्तीमा १७५ जना कार्यकर्ताको अन्तर्वार्ता लिनुका साथै अन्य आवश्यक जानकारी पनि संकलन गरेका थिए।
भरिभराऊ मिरासदारले हिन्दुस्थान समाचारसँग कुरा गर्दै पुस्तकमा संघ तथा यससँग सम्बन्धित विभिन्न संगठनहरूले पूर्वोत्तर क्षेत्रमा गरेका कार्यबाट भएको सामाजिक तथा सांस्कृतिक परिवर्तनको संक्षिप्त विवरण प्रस्तुत गरिएको बताए। साथै, असममा संघको कार्य विस्तारमा महत्वपूर्ण योगदान पुर्याएका ६२ जना कार्यकर्ताका अन्तर्वार्ता पनि पुस्तकमा समावेश गरिएको उनले जानकारी दिए।
उनका अनुसार, असमसहित पूर्वोत्तर क्षेत्रमा संघको कार्यबाट आएको सांस्कृतिक परिवर्तन र त्यसमा कार्यकर्ताहरूको योगदानलाई समेटेर तयार पारिएको कुनै आधिकारिक पुस्तक यसअघि उपलब्ध थिएन। यही कमी पूरा गर्ने उद्देश्यले ‘ग्रिट एन्ड ग्लोरी’ तयार गरिएको हो।
पुस्तकमार्फत असम तथा पूर्वोत्तरका अन्य क्षेत्रमा संघको कार्य विस्तारपछि सामाजिक तथा सांस्कृतिक क्षेत्रमा आएको परिवर्तन र त्यसमा योगदान पुर्याउने व्यक्तित्वहरूबारे जानकारी प्राप्त गर्न सकिने मिरासदारले बताए।
अंग्रेजी भाषामा प्रकाशित पुस्तकलाई चाँडै नै मराठी, हिन्दी र असमिया भाषामा पनि प्रकाशित गरिने जनाइएको छ।
हिन्दुस्थान समाचार / बिशाल
