नयाँ दिल्ली, 22 अगस्त (हि.स.)। केन्द्र सरकारले टीभी च्यानलहरूमा विज्ञापन प्रसारणमा 12 मिनेटको सीमा हटाएको छ। यस सम्बन्धमा टेलिभिजन नेटवर्क नियम 1994 मा संशोधन गर्ने राजपत्र अधिसूचना 21 अगस्त 2026 मा जारी गरियो, जसबाट नयाँ नियम प्रभावकारी भयो।

सूचना तथा प्रसारण मन्त्रालयले शनिवार जारी गरेको विज्ञप्तिमा टीभी प्रसारण क्षेत्रमा निष्पक्ष प्रतिस्पर्धा र व्यापार गर्न सजिलो बनाउन विज्ञापन अवधिको सीमा हटाउने निर्णय गरिएको बताएको छ।

टीभी च्यानलहरूका लागि 12 मिनेटको विज्ञापन सीमा सन् 2006 मा लागू गरिएको थियो। त्यसबेला देशमा 62 वटा मात्रै टिभी च्यानल थिए। तिनीहरूको सङ्ख्या अहिले 900 भन्दा बढ़ी छ। यस बाहेक केबल टीभीको डिजिटाइजेसनपछि डीटीएच केबल जस्ता प्लेटफर्महरूमा दर्शकहरूका लागि ठूलो सङ्ख्यामा च्यानलहरू उपलब्ध छन्।

सूचना तथा प्रसारण मन्त्रालय अनुसार, टिभी उद्योगमा अहिले पर्याप्त प्रतिस्पर्धा छ। डिजिटल मीडियामा विज्ञापन अवधिमा त्यस्तो कुनै सीमा बिना, परम्परागत टीभी च्यानलहरूका लागि समान अवसरको मुद्दा पनि थियो।

विज्ञापन अवधिको सीमा हटाउने निर्णयले टीभी च्यानलहरूलाई विज्ञापन बजारमा थप लचिलोपन दिनेछ र व्यापार गर्न सजिलो बनाउनेछ भन्ने सरकारको विश्वास छ।

अब टीभी च्यानलहरूमा अधिकतम 12 मिनेटको विज्ञापनको निर्धारित सीमा लागू हुनेछैन।

हिन्दुस्थान समाचार / भवानी थामी