क्वेटा, २४ अगस्त (हि.स.)। बलुचिस्तानको मस्तुङ जिल्लामा सैन्य लस्करमाथि भएको हमलालाई लिएर बलुच लिबरेशन आर्मी (बीएलए) ले ठूलो दाबी गरेको छ। संगठनका अनुसार, आईईडी विस्फोटपछि गरिएको घातक हमलामा १३ पाकिस्तानी सैनिक मारिएका छन् भने १० भन्दा बढी घाइते भएका छन्। यद्यपि, यी दाबीको स्वतन्त्र रूपमा पुष्टि हुन सकेको छैन।
बलुचिस्तानको अनलाइन समाचार नेटवर्क ‘द बलुचिस्तान पोस्ट’ का अनुसार, बीएलएका प्रवक्ता जियान्द बलुचले २२ अगस्तमा खदकोचा क्षेत्रमा हमला गरिएको बताएका छन्। उनका अनुसार, संगठनका लडाकुले पहिलो चरणमा एक बख्तरबन्द सैन्य वाहनलाई आईईडीमार्फत निशाना बनाएका थिए। त्यसपछि दोस्रो बख्तरबन्द गाडी तथा काफिलेमा रहेका अन्य वाहनमाथि घात लगाएर हमला गरिएको थियो।
बीएलएले उक्त कारबाहीमा आफ्नो स्पेसल ट्याक्टिकल अपरेसन्स स्क्वाडका सदस्यहरू सहभागी भएको दाबी गरेको छ।
स्थानीय स्रोतका अनुसार, प्रारम्भिक विस्फोटमा एउटा बख्तरबन्द वाहन नष्ट भएको थियो भने अर्को वाहनमा क्षति पुगेको थियो। त्यसपछि सशस्त्र हमलाकारीहरूले लस्करमाथि गोलीबारी गरेका थिए, जसमा अर्को सैन्य वाहनमा समेत क्षति पुगेको बताइएको छ।
हमलापछि बलुचिस्तान गृह विभागले खदकोचा तथा आसपासका क्षेत्रमा २३ अगस्त बिहान ७ बजुदेखि अनिश्चितकालीन कर्फ्यु लागू गरेको छ।
यसैबीच, आइतबार बीएलएले तुरबतको हीरबाद क्षेत्रमा भएको छुट्टै हमलाको पनि जिम्मेवारी लिएको छ। संगठनका अनुसार, उक्त हमलामा तीन पाकिस्तानी सैनिक मारिएका तथा तीन जना घाइते भएका छन्।
यद्यपि, अधिकारीहरूले हीरबादमा फ्रन्टियर कर्प्स (एफसी) को सडक खोजी टोलीमाथि हमला भएको पुष्टि गर्दै तीन जवान घाइते भएको बताएका छन्। अधिकारीहरूका अनुसार, तीनवटा मोटरसाइकलमा आएका छ जना सशस्त्र व्यक्तिले टोलीमाथि ग्रेनेड प्रहार गर्नुका साथै गोलीबारी गरेका थिए। सुरक्षाकर्मीको जवाफी कारबाहीपछि हमलाकारीहरू घटनास्थलबाट फरार भएका थिए।
बीएलएले नोश्की, कलात, खारन, वाशुक, जेहरी र चागाईलगायत बलुचिस्तानका विभिन्न क्षेत्रमा थप आठवटा कारबाही गरेको दाबी पनि गरेको छ। संगठनले ती कारबाहीसँग सम्बन्धित विस्तृत विवरण आगामी साप्ताहिक वक्तव्यमार्फत सार्वजनिक गर्ने जनाएको छ।
बलुचिस्तानमा लामो समयदेखि पृथकतावादी संगठन र पाकिस्तानी सुरक्षा बलबीच सशस्त्र द्वन्द्व जारी छ। मस्तुङ र तुरबतमा भएका पछिल्ला हमलाका दाबीबीच क्षेत्रमा सुरक्षा व्यवस्था थप कडा पारिएको छ।
हिन्दुस्थान समाचार / बिशाल
