इम्फाल, 24 अगस्त (हि.स.)। सोमवार मणिपुरको सेनापति जिल्लाको तपोहौ क्षेत्रमा दुई समूहबीच भएको गोलीबारीको घटनामा कम्तीमा दुई घर जलाइयो जबकि केन्द्रिय रिजर्भ पुलिस फोर्स (सिआरपिएफ) का एक जवान घाइते भएका छन्। उक्त घटनाले नागा र कुकी समुदायबीच तनाव बढ़ाएको छ।

आगलागीको घटना बिहान 4ः30 बजीतिर भएको हो। सशस्त्र व्यक्तिहरूले कथित रूपमा घरहरूलाई निशाना बनाएर आगो लगाइदिए, जसले स्थानीयहरूमा चिन्ता बढ़ाएको छ।

अधिकारीहरू अनुसार, स्थिति नियन्त्रण गर्दा बिहान 10 बजीतिर दुई समूहबीच गोलीबारी भयो, जसमा सीआरपीएफको 36औँ बटालियनका सब इन्सपेक्टर (जनरल ड्युटी) प्रदीप सिंहको देब्रे खुट्टामा गोली लाग्यो। उनलाई सेनापति अस्पतालमा लगियो। अज्ञात उपद्रवीहरूले विभिन्न समुदायका दुई घर जलाएपछि यो गोलीबारी भएको हो। पुलिस सूत्रहरू अनुसार, एउटा घर कुकी समुदायका सदस्यको थियो भने अर्को घर पौमाई नागा समुदायका सदस्यको थियो।

स्थिति नियन्त्रण गर्न र हिंसा बढ्न नदिन तपोहौ क्षेत्रमा अतिरिक्त सुरक्षा बल तैनाथ गरिएको छ।

सशस्त्र कुकी समूहले लियाङमाई नागा गाउँमा आक्रमण गरेको स्थानीयहरूले आरोप लगाएका छन्। घटनाको विरोधमा मानिसहरूले इम्फाललाई दिमापुरसँग जोड्ने सेनापति मुख्यालय नजिकै राष्ट्रिय राजमार्ग-2 अवरुद्ध गरे। प्रदर्शनकारीहरूले राजमार्गमा टायर जलाए।

तपोहाउ कुकी गाउँ प्राधिकरणले घर जलाउने घटनालाई अत्यन्त निन्दनीय, अमानवीय र अस्वीकार्य भन्दै निन्दा गरेको छ। उनले जिल्ला प्रशासन र पुलिसलाई दोषीको पहिचान गरी कानुनी कारबाही गर्न माग गरे।

हिंसाका थुप्रै घटनापछि यस क्षेत्रमा नागा र कुकी समुदायबीच तनाव बढ़ेको छ। यसअघि 13 मईमा नोनी र काङ्गपोकपी जिल्लामा अज्ञात सशस्त्र व्यक्तिहरूले दुई वटा छुट्टै आक्रमण गरेका थिए। धेरै मानिसहरूको मृत्यु भयो। घटनापछि उक्त क्षेत्रमा केही समयका लागि तनाव व्याप्त भएको थियो।

हिन्दुस्थान समाचार / भवानी थामी