नयाँ दिल्ली, २४ अगस्त (हि.स.)। पूर्व केन्द्रिय मन्त्री तथा भारतीय जनता पार्टी (भाजपा) का वरिष्ठ नेता अरुण जेटलीको पुण्यतिथिको अवसरमा सोमबार लोकसभा अध्यक्ष ओम बिरला, केन्द्रिय गृहमन्त्री तथा सहकारिता मन्त्री अमित शाहलगायत विभिन्न नेताहरूले भावपूर्ण श्रद्धाञ्जली अर्पण गरेका छन्। यसै अवसरमा क्रान्तिकारी शहीद शिवराम हरि राजगुरुको जयन्तीमा पनि नेताहरूले श्रद्धापूर्वक स्मरण गर्दै भारतको स्वतन्त्रता आन्दोलनमा उनको योगदानलाई सम्झिएका छन्।

लोकसभा अध्यक्ष ओम बिरलाले अरुण जेटलीलाई सम्झँदै उनको व्यक्तित्व असाधारण प्रतिभा, दूरदर्शिता तथा लोकतान्त्रिक मूल्यमान्यताप्रतिको अटल प्रतिबद्धताको प्रतीक रहेको बताएका छन्। उनले प्रभावशाली वक्तृत्वकला, गहन विद्वत्ता तथा प्रशासनिक दक्षतामार्फत जेटलीले सार्वजनिक जीवनमा राष्ट्रको सेवा गरेको उल्लेख गरे।

केन्द्रिय गृहमन्त्री अमित शाहले अरुण जेटली उत्कृष्ट कानुनी विज्ञ, प्रभावशाली वक्ता तथा कुशल प्रशासक भएको बताए। उनले प्रभावकारी संवादमार्फत सरकारका नीतिहरू आम जनतासम्म पुर्याउन महत्वपूर्ण भूमिका निर्वाह गरेको उल्लेख गरे। शाहका अनुसार, जेटलीले सरकारका धेरै महत्वपूर्ण नीतिहरू कार्यान्वयन गर्न उल्लेखनीय योगदान दिएका थिए र उनको अमिट विरासतले आगामी पुस्ताका नेताहरूलाई निरन्तर प्रेरणा दिइरहनेछ।

विदेशमन्त्री एस. जयशंकरले अरुण जेटली धेरै व्यक्तिका मित्र तथा मार्गदर्शक रहेको बताए। उनले जेटलीको विवेकशीलता, आत्मीयता र जनसेवाप्रतिको समर्पण आज पनि प्रेरणाको स्रोत बनेको उल्लेख गरे।

रक्षामन्त्री राजनाथ सिंहले संविधान र कानुनका गहिरा जानकार अरुण जेटली कुशल प्रशासक तथा उत्कृष्ट सांसद रहेको बताए। राजनीति र नीतिगत विषयहरूमा उनको गहिरो समझ, दूरदर्शिता तथा तार्किक दृष्टिकोण सधैं प्रेरणादायी रहने उनले बताए। देशहितप्रतिको समर्पण र सार्वजनिक जीवनमा उनको अमूल्य योगदान सदैव स्मरणीय रहने सिंहको भनाइ थियो।

केन्द्रिय सडक यातायात तथा राजमार्ग मन्त्री नितिन गडकरीले पद्म विभूषण सम्मानित भाजपा नेता तथा पूर्व केन्द्रिय मन्त्री अरुण जेटलीलाई उनको पुण्यतिथिका अवसरमा श्रद्धापूर्वक नमन गरेका छन्।

त्यसैगरी केन्द्रिय कपडा मन्त्री गिरिराज सिंहले देशको आर्थिक संरचना सुदृढ़ बनाउन, वस्तु तथा सेवा कर (जीएसटी) जस्ता ऐतिहासिक सुधार लागू गर्न तथा संगठनलाई मजबुत बनाउन अरुण जेटलीले दिएको योगदान सदैव अविस्मरणीय रहने बताएका छन्।

हिन्दुस्थान समाचार / भवानी थामी