काठमाडौँ, २६ अगस्त (हि.स.)। तिब्बततर्फ बुधबार बिहान हिमताल फुटेर आएको भीषण बाढीका कारण नेपाल-चीन सीमावर्ती क्षेत्रमा नेपालतर्फ आउन तथा चीनतर्फ जानका लागि राखिएका ५०० भन्दा बढी कन्टेनर बाढीले बगाएको खबर छ।
नेपाल हिमालय सीमापार वाणिज्य संघका अनुसार, रसुवाको टिमुरेस्थित भन्सार कार्यालयको यार्डमा राखिएका सयौँ कन्टेनर बाढीमा बगेका छन्। संघका सचिव आङदोर्जे शेर्पाका अनुसार, प्रारम्भिक विवरणमा यार्डमा राखिएका करिब २०० कन्टेनर बाढीले बगाएको पाइएको छ। त्यस्तै, चीनतर्फ सामान लिन जानका लागि तयारी अवस्थामा रहेका करिब ३०० कन्टेनर पनि बाढीको चपेटामा परेका छन्।
शेर्पाका अनुसार, तीमध्ये करिब १० प्रतिशत कन्टेनर मात्र जोगिएको हुन सक्ने प्रारम्भिक अनुमान छ। टिमुरेमा रहेका आफन्तबाट प्राप्त जानकारी उद्धृत गर्दै उनले बाढीले पूरै बस्ती नै बगाएको र सडक तथा चीनतर्फ जाने मार्गको समेत कुनै निशान नरहेको बताएका छन्।
उनका अनुसार, उद्धारका लागि हाल एउटा हेलिकोप्टर टिमुरे पुगेको छ। हेलिकोप्टरमार्फत ७-८ जना घाइतेको उद्धार गरी काठमाडौँ पठाइएको छ। भन्सार कार्यालय रहेको टिमुरे क्षेत्रमा बाढीको पानी केही घट्न थालेको तथा टेलिफोन सेवा पनि विस्तारै सञ्चालनमा आउन थालेको जनाइएको छ।
संघका अध्यक्ष रामहरि कार्कीले पनि सयौँ कन्टेनर तथा ठूलो संख्यामा मानिस बाढीको चपेटामा परेको बताएका छन्। अचानक आएको भीषण बाढीका कारण ठूलो जनधनको क्षति भएको उनको भनाइ छ।
हिन्दुस्थान समाचार / बिशाल
