काठमाडौँ, २६ अगस्त (हि.स.)। तिब्बततर्फबाट आएको भीषण बाढीका कारण नेपालकाे रसुवा जिल्लामा बुधबार बिहान ठूलो क्षति भएको छ। बाढीमा परेर रसुवामा २८ जना सुरक्षाकर्मी बेपत्ता भएका छन्। बाढीका कारण टिमुरे, स्याफ्रुबेसीलगायत नदी तटीय क्षेत्रमा व्यापक क्षति पुगेको छ।
बागमती प्रदेश पुलिस प्रमुख डीआईजी दीपक रेग्मीका अनुसार, रसुवागढी पुलिस चौकीमा कार्यरत २२ पुलिसमध्ये ९ जनासँग मात्र सम्पर्क भएको छ भने १३ जना अझै सम्पर्कविहीन छन्। त्यस्तै, स्याफ्रुबेसीमा कार्यरत ९ पुलिसमध्ये ३ जनासँग मात्र सम्पर्क हुन सकेको छ। बाढीका कारण पुलिस कार्यालयसमेत बगेको जनाइएको छ। टिमुरे बीओपीमा कार्यरत ९ सशस्त्र पुलिस पनि बेपत्ता भएको बताइएको छ।
रसुवामा बुधबार बिहान करिब ९ बजी आएको बाढीले टिमुरे, स्याफ्रुबेसीसहित नदी किनारका क्षेत्रमा ठूलो क्षति पुर्याएको छ। प्रभावित क्षेत्रमा नेपालका तीनवटै सुरक्षा निकायलाई खोज, उद्धार तथा राहत कार्यमा परिचालन गरिएको छ। नेपाली सेनाले खोज तथा उद्धारका लागि दुई हेलिकोप्टरसहित विशेष टोली परिचालन गरेको छ। अस्पतालहरूमा सेनाका स्वास्थ्यकर्मीको टोलीसमेत खटाइएको छ। धुन्चे, रसुवा तथा धादिङको गजुरीबाट पनि नेपाली सेनाका उद्धार टोली प्रभावित क्षेत्रमा पठाइएको छ।
काठमाडौँदेखि भरतपुरसम्म पृथ्वी राजमार्ग बन्द
भोटेकोसी नदीमा आएको अचानक बाढीका कारण काठमाडौँको नागढुंगादेखि चितवनको भरतपुरसम्म पृथ्वी राजमार्ग पूर्ण रूपमा बन्द गरिएको छ। केन्द्रिय पुलिस प्रवक्ता डीआईजी अविनारायण काफ्लेका अनुसार, धादिङ जिल्लाका राजमार्ग क्षेत्रसमेत बाढीबाट प्रभावित भएका छन्। सम्भावित जोखिमलाई ध्यानमा राख्दै दुवै दिशाबाट सवारीसाधनको आवागमन रोकिएको छ।
बाढीका कारण दर्जनौँ बस्ती तथा बजार प्रभावित भएको पुलिसले जनाएको छ। नदी तटीय क्षेत्रका बासिन्दालाई सुरक्षित स्थानमा सार्न काठमाडौँबाट आपदा प्रबन्धन पुलिसको टोलीसमेत प्रभावित क्षेत्रमा पठाइएको छ।
बाढी सतर्कता केन्द्रले तिब्बतबाट आएको भोटेकोसी नदीको भीषण बाढीको प्रभाव चितवनसम्म पुग्न सक्ने चेताउनी दिएको छ। केन्द्रले नदी तटीय क्षेत्रमा तत्काल उच्च सतर्कता अपनाउन आग्रह गरेको छ।
बाढी पूर्वानुमान शाखाले पृथ्वी राजमार्गलगायत क्षेत्रका प्रमुख करिडोर मार्ग बन्द गरी यातायात रोक्न सरकारलाई आग्रह गरेको छ। बाढीका कारण रसुवा र नुवाकोटका नदी तटीय क्षेत्रमा ठूलो क्षति पुगेको छ भने यसको प्रभाव मुग्लिनसम्म पर्न सक्ने आशंका गरिएको छ। त्रिशूली नदीसँग जोडिएका सबै नदी तटीय क्षेत्रलाई जोखिमयुक्त क्षेत्रका रूपमा राख्दै स्थानीय बासिन्दालाई विशेष सतर्कता अपनाउन आग्रह गरिएको छ।
यसैबीच, रसुवास्थित भोटेकोसी नदीमा आएको बाढीसँगै विभिन्न स्थानमा पह्रोसमेत गएको छ। ट्राफिक पुलिसले पृथ्वी राजमार्ग र पासाङल्हामु राजमार्ग हुँदै सञ्चालन हुने सार्वजनिक सवारीसाधनको आवागमन रोकिएको जनाएको छ।
काठमाडौँ ट्राफिक पुलिस कार्यालयका प्रवक्ता एसपी नरेशराज सुवेदीका अनुसार, काठमाडौँबाट पृथ्वी राजमार्ग हुँदै चितवनसहित पश्चिमी जिल्ला, पोखरा, गोरखा, लमजुङ, धादिङ, नुवाकोट र रसुवा जाने सवारीसाधनलाई काठमाडौँमै रोकिएको छ।
हिन्दुस्थान समाचार / बिशाल
