काठमाडौं, २६ अगस्त (हि.स.)। तिब्बतबाट एक्कासी आएको भीषण पानीको बहावले नेपालकाे रसुवा जिल्लाको टिमुरे बजार क्षेत्रमा ठूलो क्षति पुर्याएको छ। बाढीका कारण लेन्दे खोला (भोटेकोशी नदी) ले उग्र रुप लिएपछि टिमुरेसहित आसपासका दुईवटा बजार क्षेत्र पूर्ण रूपमा तहसनहस भएका छन्।
रसुवाका सहायक प्रमुख जिल्ला अधिकारी ध्रुवप्रसाद अधिकारीका अनुसार, बाढीले बजार क्षेत्रसँगै भन्सार कार्यालय परिसरमा पनि व्यापक क्षति पुर्याएको छ। रसुवा भन्सार क्षेत्रमा रहेका ठूलो संख्याका सवारीसाधन तथा अन्य सामग्री बाढीले बगाएको छ। गत वर्षको बाढीबाट क्षतिग्रस्त स्थानमा हालै निर्माण गरिएको नयाँ पुल समेत बाढीले बगाएको छ।
जिल्ला पुलिस कार्यालय रसुवाका अनुसार, बुधबार बिहान करिब ९ बजी आएको आकस्मिक भीषण बाढीले टिमुरे बजारको बस्ती प्रभावित भएको हो। प्रमुख जिल्ला अधिकारी नरेन्द्र परियारले बाढीबाट ठूलो परिमाणमा क्षति भएको जानकारी दिएका छन्। तल्लो तटीय क्षेत्रमा रहेका जलविद्युत् परियोजनाहरू बगाएको तथा बस्तीहरूमा बाढीको पानी पसेको खबर पनि प्राप्त भएको उनले बताए।
नेपाल पुलिसका तीनवटा कार्यालयमा समेत ठूलो क्षति पुगेको छ। पुलिस प्रधान कार्यालयका अनुसार, इलाका पुलिस कार्यालय टिमुरे, पुलिस चौकी स्याफ्रुबेसी तथा पुलिसको रसुवागढी बाढीबाट प्रभावित भएका छन्।
यसैबीच बाढीको पानी नुवाकोट जिल्लासम्म पुगेको पुष्टि भएको छ। जिल्ला प्रशासन कार्यालय नुवाकोटका सूचना अधिकारी रूपेशप्रसाद नेपालले यसबारे जानकारी दिएका छन्।
चार जिल्लातर्फ जाने सवारी काठमाडौंमै रोकियो
रसुवामा आएको बाढी तथा सम्भावित जोखिमलाई ध्यानमा राख्दै ट्राफिक पुलिसले काठमाडौंबाट रसुवा, नुवाकोट, चितवन र धादिङतर्फ जाने सवारीसाधनको आवागमन अस्थायी रूपमा रोकिएको जनाएको छ। काठमाडौं उपत्यका ट्राफिक पुलिस कार्यालयका एसपी नरेशराज सुवेदीका अनुसार, बाढीको अवस्थालाई मध्यनजर गर्दै उक्त निर्णय गरिएको हो।
उद्धारका लागि दुई सैन्य हेलिकप्टर परिचालन
राहत तथा उद्धार कार्यका लागि नेपाली सेनाका दुई हेलिकप्टर रसुवा पठाइएको छ। नेपाली सेनाका प्रवक्ता तथा सहायक रथी राजाराम बस्नेतका अनुसार, दुवै हेलिकप्टर बाढी प्रभावित क्षेत्रमा परिचालन गरिएको हो। प्रधानमन्त्री तथा मन्त्रिपरिषद् कार्यालयले अन्य हेलिकप्टर कम्पनीहरूलाई समेत उच्च सतर्कतामा रहन निर्देशन दिएको छ।
पाँच जिल्लाका नदी तटीय क्षेत्रमा सतर्कता
सरकारले रसुवा, नुवाकोट, धादिङ, गोरखा र चितवन हुँदै बग्ने नदीका तटीय क्षेत्रमा बसोबास गर्ने नागरिकलाई उच्च सतर्कता अपनाउन आग्रह गरेको छ। यसैबीच गृहमन्त्री सुदन गुरुङको अध्यक्षतामा कमाण्ड पोस्टको आपत्कालीन बैठक शुरु भएको छ, जहाँ उद्धार, राहत तथा जोखिम व्यवस्थापनका विषयमा छलफल भइरहेको छ।
हिन्दुस्थान समाचार / बिशाल
