पाकिम, 07 अगस्त (हि.स.)। आगामी १० अगस्तका दिन आयोजना हुने दोस्रो आमा सम्मान दिवस तथा नवौं जन उन्मुक्ति दिवस कार्यक्रमको तयारी रम्फूको फुटबल मैदानमा तीव्र गतिमा भइरहेको छ।
अपेक्षित ठूलो जनसहभागिता तथा पर्याप्त सवारी पार्किङको व्यवस्थालाई ध्यानमा राख्दै कार्यक्रमस्थल नाम्चीस्थित भाइचुङ स्टेडियमबाट रम्फू फुटबल मैदानमा सारिएको हो। रम्फू खेल मैदानमा दर्शकहरुका लागि थप बस्ने व्यवस्था, मञ्च निर्माण तथा सवारी पार्किङका लागि पर्याप्त स्थान उपलब्ध रहेको छ।
आमा सम्मान दिवस परिवार, समुदाय तथा समाजमा आमा र महिलाहरूले पुर्याएको महत्वपूर्ण योगदानको सम्मान र कदर गर्न मनाइने गरिन्छ। यसैगरी, जन उन्मुक्ति दिवसले सिक्किमको ऐतिहासिक परिवर्तन तथा सामाजिक-आर्थिक सशक्तीकरणतर्फ जनताको यात्रालाई स्मरण गर्ने अवसर प्रदान गर्दछ।
कार्यक्रम स्थलमा हाल मञ्च निर्माण, बस्ने व्यवस्था तथा आवश्यक पूर्वाधार निर्माणलगायतका तयारी कार्यहरू तीव्र रूपमा भइरहेका छन्। सम्बन्धित निकाय तथा सरोकारवालासँगको समन्वयमा आयोजक टोलीले १० अगस्तको कार्यक्रमलाई सफल बनाउन आवश्यक सम्पूर्ण तयारीलाई अन्तिम रूप दिइरहेको छ।
---------------
हिन्दुस्थान समाचार / बिशाल
