गुवाहाटी, 09 अगस्त (हि.स.)। असममा विनाशकारी बाढीको प्रभाव अझै पनि राज्यका विभिन्न भागमा महसुस भइरहेको छ। यसैबीच, राज्य सरकारले 10 अगस्तदेखि विद्यालय खोल्ने योजना बनाइरहेको छ। तर, विद्यालयहरू हिलो-माटोले भरिएका छन्। प्रभावित व्यक्तिहरूले उच्च विद्यालयमा शरण लिइरहेका छन्। यस्तो अवस्थामा निश्चित मितिमा अध्यापन कार्य शुरु हुन्छ कि हुँदैन भनेर भन्न सकिंदैन। माथिल्लो असमको शिवसागर, चराइदेव, जोरहाट र गोलाघाटका मानिसहरूको सामान्य जीवन अझै पनि धेरै प्रभावित छ। राज्यका 12 वटा जिल्ला अझै पनि बाढीबाट प्रभावित छन्।

अगस्त 8 मा असम राज्य आपदा प्रबन्धन प्राधिकरणको तथ्याङ्कअनुसार, धनसिरी नदी (नुमालीगढ र गोलाघाट) र कुशियारा नदी (श्रीभूमि) अझै पनि यस क्षेत्रमा खतराको निशानभन्दा माथि बगिरहेको छ। शनिबार गोलाघाट जिल्लामा थप एक जनाको शव फेला परेको छ। यससँगै राज्यमा बाढीका कारण मृत्यु हुने कुल सङ्ख्या 98 पुगेको छ।

बाढीबाट प्रभावित 12 जिल्लाहरू सोनलपुर, नागांव, गोलाघाट, शिवसागर, होजाई, दर्रङ, जोरहाट, धेमाजी, चराईदेव, कार्बी आङ्लोङ, लखीमपुर र विश्वनाथ हुन्। यी जिल्लाका 30 वटा राजस्व सर्कलका कुल 460 वटा गाउँ प्रभावित भएका छन्। राज्यका कुल 147376 जना अझै पनि प्रभावित छन् र 10599.89 हेक्टर कृषि भूमि पानीमा डुबेको छ।

एसडीआरएफ, सेना/अर्धसैनिक, एनडीआरएफ, डीडीआरएफ, वायु सेना, पुलिस, फायर एण्ड इमर्जेन्सी सर्भिस (एफ एन्ड इएस), सर्कल अफिस/स्थानीय प्रशासन, नागरिक सुरक्षा/प्रशिक्षित स्वयंसेवक र फायर डिपार्टमेन्ट राहत र उद्धार कार्यमा संलग्न छन्। राज्य सरकारले शनिबार बाढी प्रभावित क्षेत्रमा 55 वटा मेडिकल टोली परिचालन गरेको छ। यसैबीच, बाढीबाट प्रभावित 135 जनालाई उद्धार गरी डुङ्गामार्फत सुरक्षित स्थानमा सारिएको छ। साथै 5 वटा गाईवस्तु पनि डुङ्गाबाट सुरक्षित स्थानमा लगिएको थियो।

बाढीले सडक, पुल र अन्य पूर्वाधारमा व्यापक क्षति पुर्याएको छ। यसलाई सुधार गर्न सरकारले निरन्तर समीक्षा बैठक गरी स्थितिको समीक्षा गरिरहेको छ। मुख्यमन्त्री डा. हिमन्त बिस्व सरमा र राज्य सरकारका धेरै मन्त्रीहरूले अधिकारीहरूसँग निरन्तर बैठक गर्दै प्रभावितहरूलाई सहयोग गर्न सबै सम्भावित कदम चालेका छन्।

--------

हिन्दुस्थान समाचार / भवानी थामी