गान्तोक, 09 अगस्त (हि.स.)। स्थानीय पर्यटकीय गन्तव्य तथा पर्वतीय पर्यटनलाई प्रवर्द्धन गर्ने उद्देश्यले सिक्किम माउन्टेनियरिङ एसोसिएसन (एसएमए) ले नयाँ ‘हिल ट्रेक’ कार्यक्रम शुरू गरेको छ। यस कार्यक्रमअन्तर्गत गान्तोक तथा आसपासका क्षेत्रलाई पैदल यात्रामार्फत पर्यटकमाझ परिचित गराउने लक्ष्य राखिएको छ।
कार्यक्रमअन्तर्गत पहिलो पदयात्रा शनिबार सम्पन्न भयो। ह्वाइट मेमोरियल हल, गान्तोकदेखि हनुमान टोकसम्म करिब १२ किलोमिटर दूरीको पदयात्रामा स्थानीय विद्यार्थी तथा अन्य राज्यबाट आएका आगन्तुकहरू सहभागी बने।
एसएमएका अध्यक्ष तथा एभरेस्टर कुञ्जाङ ग्याछो पदयात्राको नेतृत्व गरेका थिए। उनले ‘हिल ट्रेक’ कार्यक्रम प्रत्येक महिनाको दोस्रो र चौथो शनिबार अथवा सार्वजनिक बिदाका दिन सञ्चालन गरिने जानकारी दिए। कार्यक्रमको मुख्य उद्देश्य गान्तोक तथा आसपासका कम परिचित स्थानीय क्षेत्रहरूको अन्वेषण गर्दै तिनलाई पर्यटनको दृष्टिले प्रवर्द्धन गर्नु रहेको उनले बताए।
पहिलो पदयात्रामा करिब २० जना विद्यार्थी तथा वयस्कहरू सहभागी भएका थिए। यस पहलको मुख्य उद्देश्य सिक्किममा पर्वतीय पर्यटन तथा एकदिने पदयात्रा पर्यटनलाई प्रवर्द्धन गर्नु रहेको एसएमएले जनाएको छ।
पदयात्रा सम्पन्न भएपछि सहभागीहरूले आफ्ना अनुभवहरू साझा गर्दै कार्यक्रम आयोजना गरेकोमा सिक्किम माउन्टेनियरिङ एसोसिएसनप्रति आभार व्यक्त गरे।
पदयात्राका क्रममा माउन्टेनियरिङ एन्ड एडभेन्चर इन्स्टिच्युट (एमएआई) ले प्राविधिक सहयोग प्रदान गरेको थियो।
एसएमएका अनुसार ‘हिल ट्रेक’ कार्यक्रमले स्वस्थ तथा सक्रिय जीवनशैलीका लागि बाहिरी गतिविधिलाई प्रोत्साहन गर्नुका साथै सिक्किमको प्राकृतिक सौन्दर्य र भू-दृश्यबारे जनचेतना अभिवृद्धि गर्नेछ। यसले स्थानीय साहसिक पर्यटन तथा पर्वतीय पर्यटनको सम्भावनालाई थप विस्तार गर्नसमेत योगदान पुर्याउने अपेक्षा गरिएको छ।
---------------
हिन्दुस्थान समाचार / बिशाल
