सूरत, 0१ सेप्टेम्बर (हि.स.)। गुजरात र राजस्थानबीच रेल सम्पर्कलाई थप सुदृढ गर्ने दिशामा रेलवे बोर्डले महत्वपूर्ण निर्णय गरेको छ। उदयपुर सिटी-असरवाबीच सञ्चालन हुँदै आएको वन्दे भारत एक्सप्रेसलाई सूरतसम्म विस्तार गर्न सैद्धान्तिक स्वीकृति प्रदान गरिएको छ। यसबाट दक्षिण गुजरातका यात्रुहरूले उदयपुर तथा राजस्थानका अन्य प्रमुख पर्यटकीय र धार्मिक स्थलसम्म सीधा रेल सेवा प्राप्त गर्ने सुविधा पाउने भएका छन्।

प्रस्तावित व्यवस्थाअनुसार यो रेल मंगलबारबाहेक सातामा ६ दिन सञ्चालन हुनेछ। सूरतबाट बिहान ६:१० बजी प्रस्थान गरी दिउँसो १:४० बजी उदयपुर सिटी पुग्नेछ। फर्कने क्रममा उदयपुर सिटीबाट दिउँसो ३:३५ बजी प्रस्थान गरी राति ११ बजी सूरत पुग्नेछ। विस्तारित मार्गमा भरुच, वडोदरा, आणन्द, मणिनगर, असरवा, हिम्मतनगर, शामलाजी रोड, डुंगरपुर र जावर प्रमुख स्टपेज रहनेछन्।

यो रेल सेवा सूरतसम्म विस्तार भएपछि दक्षिण गुजरातका व्यापारी, पर्यटक तथा राजस्थान जाने श्रद्धालुहरूलाई ठूलो सुविधा पुग्ने अपेक्षा गरिएको छ। विशेषगरी उदयपुर र श्रीनाथद्वारा जाने यात्रुहरूका लागि यो सीधा रेल सेवा महत्वपूर्ण हुने बताइएको छ।

यद्यपि, विस्तारित सेवा कुन मितिदेखि शुरु हुनेछ भन्नेबारे पश्चिम रेलवेले अन्तिम आधिकारिक घोषणा गर्न बाँकी छ। रेलवेले सञ्चालन मिति र अन्तिम समयतालिका सार्वजनिक गरेपछि यसबारे स्पष्ट जानकारी प्राप्त हुनेछ।

केन्द्रिय जलशक्ति मन्त्री सीआर पाटिलले सामाजिक सञ्जालमार्फत यसबारे जानकारी साझा गर्दै प्रधानमन्त्री नरेन्द्र मोदी र रेलमन्त्री अश्विनी वैष्णवप्रति धन्यवाद व्यक्त गरेका छन्। उनले चाँडै नै यो आधुनिक रेल सेवा शुरु हुने बताउँदै यसलाई सूरतसहित सम्पूर्ण दक्षिण गुजरातका लागि महत्वपूर्ण सौगात भएको उल्लेख गरेका छन्।

हिन्दुस्थान समाचार / भवानी थामी