न्युयोर्क, 10 सेप्टेम्बर (हि.स.)। कजाखस्तानकी एलेना राइबाकिनाले बुधबार झेङ छिनवेनलाई तीन सेटमा पराजित गर्दै पहिलोपटक यूएस ओपनको सेमिफाइनलमा स्थान बनाएकी छन्। यस जितसँगै राइबाकिनाले विश्व नम्बर-१ वरीयता पनि सुनिश्चित गरेकी छन्। सोमबार सार्वजनिक हुने नयाँ डब्ल्यूटीए वरीयतामा उनले आर्यना सबालेन्कालाई पछि पार्दै शीर्ष स्थान हासिल गर्नेछिन्।

अस्ट्रेलियन ओपन विजेता राइबाकिनाले आर्थर ऐश स्टेडियममा शुरुआती कठिनाइबाट उत्कृष्ट पुनरागमन गर्दै झेङलाई ३-६, ६-१, ६-४ ले पराजित गरिन्। २७ वर्षीया राइबाकिना पहिलोपटक यूएस ओपनको अन्तिम चारमा पुगेकी हुन्।

राइबाकिना शीर्ष वरीयतामा पुगेपछि सबालेन्काको विश्व नम्बर-१ मा लगातार ९९ हप्ताको वर्चस्व समाप्त हुनेछ। यद्यपि नयाँ उपलब्धिका बावजुद राइबाकिनाले अहिले आफ्नो सम्पूर्ण ध्यान प्रतियोगिता जित्ने र सेमिफाइनलका लागि आफूलाई तयार राख्नमा रहेको बताएकी छन्।

सेमिफाइनलमा राइबाकिनाको सामना चौथो वरीयताकी कोको गफ वा पाँचौँ वरीयताकी मिर्रा आन्द्रीवासँग हुनेछ। अर्को सेमिफाइनलमा सबालेन्काले तेस्रो वरीयताकी जेसिका पेगुलासँग प्रतिस्पर्धा गर्नेछिन्।

झेङविरुद्धको खेलमा राइबाकिनाले शुरुआतमा निकै कठिनाई बेहोर्नुपरेको थियो। आर्थर ऐश स्टेडियममा घाम र छायाको बदलिँदो अवस्थाका कारण उनले आफ्नो लय समात्न सकेकी थिइनन्। झेङले यसको फाइदा उठाउँदै पहिलो सेटमा एक मात्र ब्रेक हासिल गरिन् र ६-३ ले सेट जितिन्।

दोस्रो सेटमा राइबाकिनाले उत्कृष्ट पुनरागमन गरिन्। उनको सर्भिस र बेसलाइन खेलमा सुधार आयो र ३८ मिनेटमै दोस्रो सेट ६-१ ले जित्दै खेललाई निर्णायक सेटमा पुर्‍याइन्।

तेस्रो सेटमा दुवै खेलाडीबीच कडा प्रतिस्पर्धा भयो। ४-४ को अवस्थामा झेङले गरेको डबल फल्टको फाइदा उठाउँदै राइबाकिनाले ५-४ को अग्रता बनाइन्। त्यसपछि आफ्नो सर्भिस जोगाउँदै उनले खेल आफ्नो पक्षमा पारिन्।

झेङका लागि क्वार्टरफाइनलसम्मको यात्रा पनि प्रभावशाली रह्यो। कुहिनोको शल्यक्रियापछि उनको वरीयता घटेर १२१औँ स्थानमा पुगेको थियो र यूएस ओपनको मुख्य प्रतिस्पर्धामा प्रवेश गर्न उनले छनोट चरण खेल्नुपरेको थियो। सन् २०२४ की ओलम्पिक च्याम्पियन तथा पूर्व विश्व नम्बर-४ झेङ अब शीर्ष ६० मा फर्किनेछिन्।

राइबाकिनाले यूएस ओपनमा सेमिफाइनलमा पुग्न सके सबालेन्कालाई पछि पार्दै आफु विश्व नम्बर-१ बन्ने बुझेकी थिइन्। अब उक्त लक्ष्य हासिल गरेपछि अब उनको ध्यान यूएस ओपनको उपाधि जितेर यस सिजनमा अर्को ठूलो उपलब्धि थप्नेमा केन्द्रित हुनेछ।

हिन्दुस्थान समाचार / बिशाल