गेजिङ, 10 सेप्टेम्बर (हि.स.)। गेजिङ जिल्लाको आरिगाउॅंस्थित सञ्चमान लिम्बू सरकारी कलेजमा बिहीबार स्वच्छता पखवाडाअन्तर्गत एकदिने सरसफाई अभियान सञ्चालन गरियो। कलेजका राष्ट्रिय सेवा योजना (एनएसएस) एकाइले हरित परिसर समितिको सहकार्यमा उक्त अभियान आयोजना गरेको थियो।
सरसफाई अभियानअन्तर्गत कलेज परिसरका विभिन्न १६ विभागीय स्थानमा सरसफाई कार्यक्रम सञ्चालन गरिएको थियो। विद्यार्थी तथा कलेज समुदायमा स्वच्छता, पर्यावरणीय जिम्मेवारी र सक्रिय सहभागिताको भावना अभिवृद्धि गर्ने उद्देश्यले अभियान आयोजना गरिएको बताइएको छ।
कार्यक्रममा कलेजका प्राचार्य प्रा. (डा.) भक्त कुँवर, उपप्राचार्य, विद्यार्थी मामिलाका डीन, विभिन्न विभागका प्रमुख, प्राध्यापक, विद्यार्थी, विद्यार्थी प्रतिनिधि परिषद्का सदस्य तथा गैरशिक्षण कर्मचारीहरूको सक्रिय सहभागिता रहेको थियो। कलेज समुदायको सामूहिक सहभागिताले स्वच्छ, हरित तथा स्वस्थ परिसर निर्माणप्रतिको प्रतिबद्धता झल्काएको कलेजले जनाएको छ।
कलेजले हरित परिसर समितिका संयोजक डा. थुप्देन पाल्जाङ भोटिया तथा उनको टोली र राष्ट्रिय सेवा योजना एकाइका कार्यक्रम अधिकारी पेमा लोडा लेप्चा तथा उनको टोलीलाई अभियानको पहल तथा समन्वयका लागि धन्यवाद व्यक्त गरेको छ।
त्यसैगरी, सबै विभागीय प्रमुख, सहायक प्राध्यापक, प्राध्यापक, विद्यार्थी प्रतिनिधि परिषद्का सदस्य तथा गैरशिक्षण कर्मचारीलाई कार्यक्रम सफल बनाउन पुर्याएको सहयोग र सक्रिय सहभागिताका लागि कलेजले आभार व्यक्त गरेको छ।
अभियानको समापनसँगै कलेज समुदायले परिसरमा निरन्तर स्वच्छता कायम राख्दै दिगो तथा पर्यावरणमैत्री परिसर निर्माण गर्ने प्रतिबद्धता दोहोर्याएको छ।
हिन्दुस्थान समाचार / बिशाल
10 Sep 2026
