नयाँ दिल्ली, ११ सेप्टेम्बर (हि.स.)। प्रधानमन्त्री नरेन्द्र मोदीले शुक्रवार रुसी राष्ट्रपति भ्लादिमिर पुतिनसँग भएको द्विपक्षीय वार्ताका क्रममा महान् तमिल कवि, दार्शनिक तथा सन्त तिरुवल्लुवरको अमर कृति ‘तिरुक्कुरल’ को रुसी अनुवाद उपहारस्वरूप प्रदान गरे। मोदीले उक्त पुस्तकले महान् तिरुवल्लुवरको शाश्वत ज्ञान परम्परालाई भाषिक तथा भौगोलिक सीमाभन्दा पर पुर्याउने बताएका छन्।
भारत मण्डपममा भएको भेटका क्रममा दुवै नेताले एकअर्कालाई आत्मीयतापूर्वक अभिवादन गर्दै विभिन्न द्विपक्षीय तथा साझा हितका विषयमा छलफल गरे। त्यसपछि प्रधानमन्त्री मोदीले सामाजिक सञ्जाल ‘एक्स’मा भेटवार्ताको भीडियो साझा गर्दै पुतिनलाई ‘तिरुक्कुरल’ को रुसी अनुवाद उपहार दिएको जानकारी दिएका हुन्।
मोदीले भने, “राष्ट्रपति पुतिनलाई तिरुक्कुरलको रुसी अनुवाद उपहार दिएँ, जसले महान् तिरुवल्लुवरको शाश्वत ज्ञानलाई भाषिक तथा भौगोलिक सीमाभन्दा पर पुर्याउँछ।”
‘तिरुक्कुरल’ तमिल साहित्यको महान् कृतिमध्ये एक हुन्। यसमा नैतिकता, सदाचार, शासन, सामाजिक जीवन तथा मानवीय मूल्यसँग सम्बन्धित विचारलाई संक्षिप्त र गहन रूपमा प्रस्तुत गरिएका १,३३० वटा दोहा छन्।
महान् कवि तथा दार्शनिक तिरुवल्लुवरको यो कृति तमिल साहित्यको महत्त्वपूर्ण रचनामध्ये एक मानिन्छ। पुतिनलाई यसको रुसी अनुवाद उपहारस्वरूप प्रदान गरिनुले भारत र रुसबीच लामो समयदेखि कायम सांस्कृतिक तथा सभ्यतागत सम्बन्धलाई समेत उजागर गरेको छ।
हिन्दुस्थान समाचार / भवानी थामी
