गान्तोक, ११ सेप्टेम्बर (हि.स.)। मुख्यमन्त्री प्रेमसिंह तामाङले ६०औँ नथुला विजय दिवसको अवसरमा भारतीय सेनाका वीर जवान, अधिकारी, सैनिक तथा पूर्वसैनिकहरू, विशेषगरी सिक्किममा सेवारत सुरक्षाकर्मीहरूलाई हार्दिक शुभकामना व्यक्त गरेका छन्।
आफ्नो सन्देशमा मुख्यमन्त्रीले यस ऐतिहासिक दिवसले राष्ट्रको सार्वभौमिकता र क्षेत्रीय अखण्डताको रक्षा गर्न अडिग रहेका सशस्त्र बलको साहस, वीरता र सर्वोच्च बलिदानको स्मरण गराउने बताएका छन्। उनले कर्तव्य निर्वाहका क्रममा सर्वोच्च बलिदान दिने सबै वीरहरूप्रति गहिरो सम्मान व्यक्त गरेका छन्।
मुख्यमन्त्रीले नथुलालाई भारतीय सशस्त्र बलको साहस, दृढ़ता र राष्ट्रिय संकल्पको स्थायी प्रतीकका रूपमा वर्णन गर्दै कठिन भौगोलिक अवस्था, तीव्र चिसो र प्रतिकूल परिस्थितिका बावजुद सैनिकहरूले राष्ट्रप्रतिको आफ्नो कर्तव्य निरन्तर निर्वाह गरिरहेको बताएका छन्।
उनले दशकौँदेखि सिक्किमको प्रगति, शान्ति र सुरक्षामा भारतीय सेनाले निर्वाह गर्दै आएको अमूल्य भूमिकालाई पनि उल्लेख गरेका छन्। सिक्किमका जनताले सशस्त्र बललाई उच्च सम्मान गर्ने र उनीहरूको सेवा तथा बलिदानप्रति गहिरो कृतज्ञ रहेको मुख्यमन्त्रीले बताएका छन्।
विजय दिवसका अवसरमा मुख्यमन्त्रीले सबैलाई सैनिकहरूको अदम्य साहसलाई नमन गर्दै राष्ट्रको एकता, अखण्डता र सार्वभौमिकताप्रति सामूहिक प्रतिबद्धता पुनः दृढ़ गर्न आह्वान गरेका छन्।
उल्लेखनीय छ, नथुला विजय दिवस सिक्किममा मनाइने महत्वपूर्ण सैनिक स्मृति दिवस हो। यो दिवस सन् १९६७ मा नथुला पास (भारत-चीन सीमा) मा भारत र चीनका सेनाबीच भएको सैन्य संघर्षमा भारतीय सेनाले देखाएको साहस र दृढ़ताको स्मरणमा मनाइन्छ।
---------------
हिन्दुस्थान समाचार / बिशाल
