मङ्गन, 11 सेप्टेम्बर (हि.स.)। मङ्गनमा अद्यावधिक ‘सिक्किम वन्यजन्तु प्रसार पूर्वानुमान तथा अनुगमन प्रणाली’ (एसएसएफएमएस) सम्बन्धी स्थलगत प्रशिक्षण सत्र आज सफलतापूर्वक सम्पन्न भएको छ। मङ्गन प्रादेशिक वन प्रभागका डीएफओ (क्षेत्रीय) मञ्जिल खरेलको अध्यक्षतामा आयोजित प्रशिक्षणमा सहायक वन संरक्षक नरेन्द्र सापकोटा तथा सीमा बस्नेत (वन्यजन्तु, मङ्गन प्रभाग) को सहभागिता रहेको थियो। प्रशिक्षण सी-ड्याकका विज्ञ डा. मनोज चव्हाण र प्रियंका डोङ्ग्रीले प्रदान गरेका थिए।
वन तथा पर्यावरण विभाग, मङ्गन जिल्लाका अनुसार, क्षेत्रीय, वन्यजन्तु तथा केएनपी प्रभागअन्तर्गत मङ्गन, लाचेन, लाचुङ, चुङथाङ, जङ्गु र फोदुङ क्षेत्रबाट मनोनित रेन्ज अधिकारी, ब्लक अधिकारी तथा कर्मचारीहरू प्रशिक्षणमा पूर्ण संख्यामा सहभागी भएका थिए।
व्यावहारिक प्रशिक्षणका क्रममा अद्यावधिक भौगोलिक सूचना प्रणालीसम्बन्धी सफ्टवेयरको प्रयोग गरी मैदानी विवरण प्रविष्ट गर्ने, वन्यजन्तुको आवागमन निगरानी गर्ने तथा संवेदनशील क्षेत्र र राष्ट्रिय निकुञ्जका मध्यवर्ती क्षेत्रमा वास्तविक समयका जोखिम सूचकहरू पहिचान गर्ने विषयमा प्रशिक्षण दिइएको थियो।
हिन्दुस्थान समाचार / बिशाल
