नयाँ दिल्ली, १४ सेप्टेम्बर (हि.स.)। भारतीय जनता पार्टी (भाजपा) का राष्ट्रिय अध्यक्ष नितिन नवीनले प्रधानमन्त्री नरेन्द्र मोदीको जन्मदिनका अवसरमा देशवासीलाई ‘आशीर्वादको दीप’ बाल्न अपील गरेका छन्। उनले प्रधानमन्त्री मोदीको मूल ध्येय ‘जनसेवाबाट देशसेवा’ रहेको र पछिल्ला २५ वर्षदेखि यही संकल्पका साथ देशको सेवा गर्दै आएको बताए।

नितिन नवीनले सोमवार जारी गरेको भीडियो सन्देशमा मोदीले देशको नेतृत्व सम्हाल्दा देशसामू अनेक चुनौती रहेको बताए। उनले नयाँ नीति तथा योजना मार्फत आम नागरिकको जीवनमा परिवर्तन ल्याउने काम गरेको उल्लेख गरे। कोरोना महामारीका क्रममा पनि प्रधानमन्त्रीको नेतृत्वमा देशले संकटलाई अवसरमा बदल्ने प्रयास गरेको तथा खोप विकास गरेर आत्मनिर्भर भारतको दिशामा आफ्नो क्षमता प्रदर्शन गरेको उनले बताए।

उनले मोदी सरकारले युवा तथा महिलालाई आत्मनिर्भर बनाउन विभिन्न कदम चालेको बताए। स्टार्टअपका माध्यमबाट युवाले नयाँ अवसर प्राप्त गरेको तथा शौचालय निर्माण र ‘लखपति दिदी’ जस्ता योजना मार्फत महिलाको सम्मान र आर्थिक सशक्तीकरणमा जोड दिइएको उनले उल्लेख गरे।

भाजपा अध्यक्षले देशको सुरक्षाको क्षेत्रमा पनि ठूलो परिवर्तन आएको दाबी गरे। नक्सलवादको प्रभावलाई धेरै हदसम्म समाप्त गरिएको तथा आतंकवाद विरुद्ध सरकारले कड़ा नीति अपनाएको उनले बताए। आज देश आफ्नो सीमाको सुरक्षाका विषयमा पहिलेभन्दा बलियो अवस्थामा रहेको उनको भनाइ छ।

नितिन नवीनले भने, देश ‘विकसित भारत @ २०४७’ को संकल्पका साथ अघि बढ़िरहेको छ। उनले प्रधानमन्त्री मोदीको जन्मदिन १७ सेप्टेम्बरका दिन साँझ ६ बजीदेखि ७ बजीसम्म आ-आफ्नो घरमा ‘आशीर्वादको दीप’ बालेर उनको दीर्घायु र सफल जीवनको कामना गर्न देशवासीसँग अपील गरे।

हिन्दुस्थान समाचार / भवानी थामी