समरकन्द, १८ सेप्टेम्बर (हि.स.)। चेस ओलम्पियाडको दोस्रो चरणमा बिहीबार भारतले खुल्ला तथा महिला दुवै वर्गमा जित हासिल गरेको छ। खुल्ला वर्गमा भारतले इन्डोनेसियालाई २.५-१.५ ले पराजित गर्‍यो भने महिला टोलीले फिनल्यान्डमाथि ३.५-०.५ को सहज जित दर्ता गर्‍यो।

प्रज्ञानानन्दको ७९ चाल लामो खेल

पहिलो चरणमा विश्राम पाएका आर. प्रज्ञानानन्दले दोस्रो चरणमा शीर्ष बोर्डमा इन्डोनेसियाका सुशान्तो मेगारान्तोविरुद्ध कालो मोहराबाट खेले। लामो समयसम्म चलेको खेल अन्त्यमा बराबरीतर्फ पुगेपछि ७९ चालपछि दुवै खेलाडीले बराबरीमा सहमति जनाए।

निहाल सरीनले भारतलाई पहिलो जित दिलाए। सेतो मोहराबाट आईएम आरिफ अब्दुल हाफिजविरुद्ध खेलेका निहालले क्रमशः दबाउ बढाउँदै अन्तिम चरणमा रणनीतिक अग्रता हासिल गरे। ३७औँ चालमा नाइटबाट चेक दिएपछि हाफिजले खेल त्यागे। ओलम्पियाडमा निहालको यो लगातार दोस्रो जित हो।

डी. गुकेशले कालो मोहराबाट आईएम सात्रिया दुटा चहायाविरुद्ध जित निकाल्न सकेनन्। स्थिति सरल बनेपछि दुवै खेलाडीबीच बराबरीको स्थिति कायम रह्यो र ५१औँ चालपछि खेल बराबरीमा टुंगियो।

विदित गुजराती र आईएम नायका बुधिधर्माबीचको खेल पनि बराबरीमा समाप्त भयो। सेतो मोहराबाट खेलेका विदितले सन्तुलित स्थिति कायम राखेपछि ३४औँ चालमा दुवैले अंक बाँडे।

यससँगै एक जित र तीन बराबरीसहित भारतले इन्डोनेसियाविरुद्ध २.५-१.५ को जित हासिल गर्‍यो। भारतले पहिलो चरणमा थाइल्यान्डलाई ३-१ ले पराजित गरेको थियो। उक्त खेलमा शीर्ष बोर्डमा अर्जुन एरिगेसी पराजित भए पनि भारतले टोलीगत जित हात पारेको थियो।

दिव्या, वन्तिका र साविताको जितले महिला टोली विजयी

महिला वर्गमा भारतले फिनल्यान्डलाई ३.५-०.५ ले पराजित गर्‍यो। कोनेरु हम्पीलाई यस चरणमा विश्राम दिइएकाले वैशाली रमेशबाबुले शीर्ष बोर्ड सम्हालिन्। उनले अनास्तासिया केइनानेनबाट कडा चुनौती सामना गरिन् र ८८ चालपछि खेल बराबरीमा टुंगियो।

अन्य तीनवटै बोर्डमा भारत विजयी रह्यो। दिव्या देशमुखले जोहाना पासिकाङस-तेल्लालाई ३८ चालमा पराजित गरिन्। वन्तिका अग्रवालले सबैभन्दा छिटो जित दर्ता गर्दै सारा-ओलिभिया सिप्पोलालाई २२ चालमै हराइन्।

साविता श्री बीले पनि उत्कृष्ट प्रदर्शन गर्दै हेल्जा लेहटिनेनलाई ३१ चालमा पराजित गरिन्। यससँगै भारतीय महिला टोलीले फिनल्यान्डविरुद्ध ३.५-०.५ को शानदार जित हासिल गर्‍यो।

सिन्दारोभको पेरुविरुद्ध जित

अन्य खेलमा जवोखिर सिन्दारोभले पेरुका डिएगो साउल रोड्री फ्लोरेस कियासलाई कालो गोटीबाट ३२ चालमा पराजित गरे। टोलीमा पुनरागमन गरेका सिन्दारोभले क्रमशः खेलमा नियन्त्रण कायम गर्दै पेरुका राजामाथि आक्रमण तीव्र बनाए।

फ्लोरेस कियास लगातार रक्षात्मक अवस्थामा पुगेपछि दबाउबाट बाहिरिन सकेनन् र अन्ततः खेल त्यागे।

हिन्दुस्थान समाचार / बिशाल