नयाँ दिल्ली, १८ सेप्टेम्बर (हि.स.)। दिल्ली तथा जिल्ला क्रिकेट सङ्घका अध्यक्ष रोहन जेटलीले भारत र अफगानिस्तानबीच सम्पन्न ‘द फ्रेन्डसिप कप’ टी२० शृङ्खलाको सफल आयोजनाप्रति खुशी व्यक्त गरेका छन्। उनले तीन खेलको शृङ्खला ३-० ले जितेकोमा भारतीय टोलीलाई बधाई दिँदै उक्त शृङ्खला क्रिकेटको उत्कृष्ट उत्सवसँगै दुई देशबीचको सम्बन्धलाई थप मजबुत बनाउने माध्यम बनेको बताएका छन्।

जेटलीले भारतीय टोलीलाई अफगानिस्तानविरुद्धको ३-० को स्मरणीय शृङ्खला जितका लागि बधाई दिँदै दिल्लीस्थित अरुण जेटली रङ्गशालामा तीनवटै खेलका क्रममा ८५ हजारभन्दा बढी दर्शकको उपस्थिति रहेको बताए। अफगानिस्तानबाट पनि हजारौँ समर्थक खेल हेर्न दिल्ली आएको उल्लेख गर्दै उनले शृङ्खलाभरि रङ्गशालामा देखिएको उत्साहले दिल्लीका क्रिकेटप्रेमीहरूको जोश प्रतिबिम्बित गरेको बताए।

उनका अनुसार, अफगानिस्तानले भारतविरुद्ध आफ्नो घरेलु शृङ्खला दिल्लीमा आयोजना गर्नु दुई देशबीचको सम्बन्ध र जनस्तरमा निकटता बढाउन खेलकुदले खेल्न सक्ने भूमिकाको उदाहरण हो। उनले यसलाई प्रधानमन्त्री नरेन्द्र मोदीको छिमेकी मुलुकहरूसँग सम्बन्ध सुदृढ बनाउने दृष्टिकोणसँग पनि जोडेर हेरेका छन्।

डीडीसीए अध्यक्ष जेटलीले शृङ्खला आयोजना गर्न सहयोग गरेकोमा अफगानिस्तान क्रिकेट बोर्ड, भारतीय क्रिकेट नियन्त्रण बोर्ड तथा अन्तरराष्ट्रिय क्रिकेट परिषद्का अध्यक्ष जय शाहप्रति आभार व्यक्त गरे। उनीहरूको सहयोग र प्रयासका कारण दिल्लीले अन्तरराष्ट्रिय क्रिकेटको यस महत्वपूर्ण अवसरको हिस्सा बन्न पाएको उनले बताए।

उनले डीडीसीए तथा दिल्लीले भारत र अफगानिस्तानबीचका तीन रोमाञ्चक खेलको आयोजना गर्न पाएकोमा गर्व लागेको उल्लेख गर्दै यसबाट क्रिकेटप्रेमीहरूले दुवै टोलीबीच उच्चस्तरीय प्रतिस्पर्धात्मक क्रिकेट हेर्ने अवसर प्राप्त गरेको बताए।

हिन्दुस्थान समाचार / बिशाल