मङ्गन, 02 सेप्टेम्बर (हि.स.)। मङ्गन जिल्ला अस्पतालमा स्थापना गरिएको एकीकृत जनस्वास्थ्य प्रयोगशाला (आईपीएचएल) को आज वन तथा पर्यावरणमन्त्री एवं जङ्गुका विधायक पिन्चो नामग्याल लेप्चाले उद्घाटन गरेका छन्। उद्घाटनपछि मन्त्री लेप्चाले प्रयोगशालाको निरीक्षण गर्नुका साथै मङ्गन जिल्ला अस्पतालस्थित डायलाइसिस केन्द्रको पनि भ्रमण गरे।

कार्यक्रमलाई सम्बोधन गर्दै मुख्य अतिथि मन्त्री लेप्चाले एकीकृत जनस्वास्थ्य प्रयोगशालाको स्थापना भएकोमा जिल्ला अस्पताल तथा मङ्गनका जनतालाई बधाई दिए। उनले प्रयोगशाला सञ्चालनमा आउनुले जिल्लाको निदानात्मक तथा स्वास्थ्य सेवा सुदृढीकरणमा महत्वपूर्ण उपलब्धि हासिल भएको बताए।

मन्त्रीले पछिल्लो एक वर्षमा स्वास्थ्य क्षेत्रमा भएको प्रगतिबारे चर्चा गर्दै प्रयोगशाला स्थापना हुन केही समय लागेको भए पनि अन्ततः सफलतापूर्वक सञ्चालनमा आएको बताए। अब यसको प्रभावकारी उपयोग गरी जनतालाई अधिकतम लाभ पुर्‍याउने जिम्मेवारी सम्बन्धित सरोकारवालाको रहेको उनले जोड दिए।

मुख्यमन्त्री प्रेमसिंह तामाङको राज्यको स्वास्थ्य पूर्वाधार सुदृढ गर्दै जनतालाई गुणस्तरीय स्वास्थ्य सेवा उपलब्ध गराउने दृष्टिकोणलाई दोहोर्‍याउँदै मन्त्रीले मङ्गन जिल्ला अस्पतालको अपरेसन थिएटर पनि चाँडै सञ्चालनमा आउने अपेक्षा गरिएको जानकारी दिए। यसबाट अस्पतालले थप व्यापक स्वास्थ्य सेवा प्रदान गर्न सक्ने उनले बताए।

मन्त्रीले आपदा तथा आपत्कालीन अवस्थाका समयमा समेत समर्पित भएर सेवा प्रदान गर्दै आएका मङ्गन जिल्ला अस्पतालका चिकित्सक, नर्स, स्वास्थ्यकर्मी तथा सहयोगी कर्मचारीहरूको प्रशंसा गरे। प्रमुख चिकित्सा अधिकारीको नेतृत्वमा अस्पतालले सञ्चालन गरेका विभिन्न काम तथा विकासात्मक पहलहरूको पनि उनले सराहना गरे।

राज्यमा विशेषज्ञ स्वास्थ्य सेवाको विकासबारे जानकारी दिँदै मन्त्रीले राजधानीमा गत १५ अगस्तदेखि मिर्गौला प्रत्यारोपण सेवा शुरु भएको बताए। जिल्लामा स्वास्थ्य सेवा थप सुदृढ गर्न आवश्यक पूर्वाधार तथा सुविधाहरू क्रमशः उपलब्ध गराइने उनले आश्वासन दिए।

मन्त्रीले भारत सरकार र सिक्किम सरकारको संयुक्त पहलमा राज्यको पहिलो सरकारी मेडिकल कलेजका रूपमा स्थापना गरिएको हेलेन लेप्चा सिक्किम सरकारी मेडिकल कलेजको पनि उल्लेख गरे। उक्त संस्थाले सुलभ तथा गुणस्तरीय चिकित्सा शिक्षा विस्तार गर्नुका साथै यस क्षेत्रमा स्वास्थ्य सेवा सुदृढ गर्न महत्वपूर्ण भूमिका खेल्ने उनले बताए।

मङ्गन जिल्ला अस्पताल परिसरमा प्रस्तावित हिलिङ गार्डन तथा वेलनेस पार्क निर्माणबारे पनि मन्त्रीले जानकारी दिए। यसले बिरामी तथा अस्पतालमा आउने आगन्तुकहरूको समग्र स्वास्थ्य, मानसिक शान्ति तथा पुनःस्वास्थ्यलाभमा सहयोग पुग्ने अपेक्षा गरिएको उनले बताए।

हिन्दुस्थान समाचार / बिशाल