गान्तोक, 02 सेप्टेम्बर (हि.स.)। सूक्ष्म, लघु तथा मध्यम उद्यम विकास तथा सहजीकरण कार्यालय, गान्तोकले भारतको जनजातीय सहकारी बजार विकास महासंघ लिमिटेडको सहकार्यमा आज देवरालीस्थित एमएसएमई-डीएफओको प्रशिक्षण हलमा जनजातीय कारीगर एम्प्यानलमेन्ट मेला आयोजना गरेको छ। कार्यक्रममा लोकसभा सांसद डा. इन्द्रहाङ सुब्बा मुख्य अतिथिका रूपमा उपस्थित थिए।

कार्यक्रमलाई सम्बोधन गर्दै लोकसभा सांसद डा. इन्द्रहाङ सुब्बाले विकसित सिक्किम निर्माणमा समाजका विभिन्न वर्गको सामूहिक जिम्मेवारी रहेको बताए। उनले जोखिम उठाएर मेहनत गर्दै बजारका लागि उत्पादन तयार गर्ने कारीगर तथा उद्यमीहरूले राज्यको आर्थिक विकासमा महत्वपूर्ण योगदान पुर्‍याइरहेको उल्लेख गरे।

सांसद सुब्बाले कारीगरहरूलाई उद्यमशीलतामा दीर्घकालीन दृष्टिकोण अपनाउन आग्रह गरे। सफल व्यवसाय निरन्तर प्रयासबाट निर्माण हुने भएकाले रातारात ठूलो आम्दानीको अपेक्षा गर्न नहुने उनले बताए। स्थापित व्यवसायहरूको उदाहरण दिँदै धैर्य, निरन्तरता तथा भावी पुस्तालाई समेत ध्यानमा राखेर उद्यम निर्माण गर्नुपर्नेमा उनले जोड दिए।

दक्ष कामदार, कारीगर तथा उद्यमीका लागि केन्द्र र राज्य सरकारले विभिन्न योजनामार्फत उपलब्ध गराउँदै आएको सहयोगबारे उनले जानकारी दिए। प्रधानमन्त्री विश्वकर्मा योजनाको उल्लेख गर्दै उनले सरकारी सहयोग ग्रामीण क्षेत्रका परम्परागत कारीगर तथा दक्ष कामदारसम्म क्रमशः पुगिरहेको बताए।

सिक्किममा प्रचलित परम्परागत सीप तथा पेशालाई सम्बन्धित सरकारी योजनाअन्तर्गत उचित रूपमा समेट्न पहल गरिने पनि सांसद सुब्बाले बताए। साथै, सिक्किमका योग्य लाभार्थीहरूका लागि प्रधानमन्त्री विश्वकर्मा योजनाको दोस्रो चरण खोल्ने विषय केन्द्र सरकारसमक्ष उठाउने उनले बताए, जसबाट थप कारीगरले योजनाको लाभ लिन सक्नेछन्।

बजार विस्तारको महत्वमा जोड दिँदै डा. सुब्बाले कारीगरहरूलाई आफ्ना उत्पादन सिक्किमको बजारमा मात्र सीमित नराखी डिजिटल तथा ई-कमर्स प्लेटफर्ममार्फत भारतभरका बजारमा पुर्‍याउन आग्रह गरे। सिक्किममा गुणस्तरीय उत्पादनको पर्याप्त सम्भावना रहेको उल्लेख गर्दै प्रभावकारी बजार व्यवस्थापनमार्फत कारीगरको आम्दानी बढाउनुका साथै राज्यको आर्थिक विकासमा योगदान पुर्‍याउन सकिने उनले बताए।

उनले सरसफाई कर्मचारीका छोराछोरीका लागि उपलब्ध शैक्षिक सहयोगबारे पनि जानकारी दिँदै योग्य परिवारलाई उपलब्ध सुविधाबारे जानकारी गराउन सहभागीहरूलाई आग्रह गरे। डा. सुब्बाले सहभागी कारीगरहरूलाई बधाई दिँदै कार्यक्रम आयोजना गर्न एमएसएमई-डीएफओ गान्तोक तथा यसको टोलीले गरेको प्रयासको प्रशंसा गरे। आगामी वर्षहरूमा कारीगरहरूले आफ्नो व्यवसायको कारोबार उल्लेखनीय रूपमा वृद्धि गर्ने विश्वास व्यक्त गर्दै उनीहरूका समस्यालाई सम्बन्धित मञ्चमा उठाउन निरन्तर सहयोग गर्ने आश्वासन दिए।

हिन्दुस्थान समाचार / बिशाल