नयाँ दिल्ली, २२ सेप्टेम्बर (हि.स.)। भारतीय जनता पार्टी (भाजपा) ले कांग्रेस नेतृ सोनिया गान्धीले साल १९८० मा भारतीय नागरिकता प्राप्त गर्नुअघि नै देशको आम निर्वाचनमा मतदान गरेको विषय उठाउँदै यसबारे न्यायिक अनुसन्धान गराउन मंगलवार माग गरेको छ।
भाजपाका राष्ट्रिय सञ्चार सह–संयोजक प्रदीप भण्डारीले यहाँ पार्टी मुख्यालयमा आयोजित पत्रकार सम्मेलनमा सोनिया गान्धीसँग सम्बन्धित मतदाता सूचीको विषयमा प्रश्न उठाए। उनले भारतीय संविधान अनुसार मतदान गर्नका लागि व्यक्ति भारतीय नागरिक हुनु आवश्यक रहेको बताए। भण्डारी अनुसार, साल १९८० मा सोनिया गान्धी भारतीय नागरिक नभएको अवस्थामा पनि उनलाई कुन आधारमा मतदान गर्ने अनुमति दिइयो भन्ने विषय अनुसन्धानको विषय रहेको छ।
प्रदीप भण्डारीले साल १९८० मै यस विषयलाई लिएर अदालतमा याचिका दायर गरिएको र सोनिया गान्धीको नाम मतदाता सूचीमा कुन आधारमा समावेश गरियो तथा उनलाई मतदान गर्ने अनुमति कसरी दिइयो भन्ने प्रश्न उठाइएको बताए। उनले यस प्रक्रियामा कथित रूपमा कागजातको जालसाजी भएको थियो कि थिएन भन्ने विषयमा पनि प्रश्न उठाए।
भण्डारीले दिल्लीको अदालतले यस विषयमा मजिस्ट्रेट अदालतलाई सम्पूर्ण घटनामा कुनै संज्ञेय अपराध बनेको छ कि छैन भन्ने अनुसन्धान गर्न निर्देश दिएको बताए। उनले अदालतको टिप्पणी उद्धृत गर्दै यसअघि मुद्दा खारेज गर्ने मजिस्ट्रेट अदालतले विषयमा पर्याप्त विचार नगरेको तथा संज्ञेय अपराध भएको खुलासा सम्बन्धी मूल प्रश्नमा उचित कारबाही नगरेको बताए।
भाजपा नेताले अदालतको धारणा यस विषयमा अनुसन्धान हुनुपर्ने रहेको बताए। उनले ‘मत चोरी’को विषयमा विपक्षीमाथि टिप्पणी गर्दै ‘मत चोरी’ को कुरा गर्नेहरू वास्तवमा लोकतन्त्रको चोरीमा संलग्न रहेको आरोप लगाए। सोनिया गान्धीसँग सम्बन्धित यस विषयमा अदालतका टिप्पणीपछि उठेका प्रश्नहरूको अनुसन्धान हुनु आवश्यक रहेको उनले बताए।
हिन्दुस्थान समाचार / भवानी थामी
