- राज्यपालले सिक्किमको आर्थिक तथा सामाजिक क्षेत्रमा मारवाडी समाजको अतुलनीय योगदानको प्रशंसा गरे
गान्तोक, २२ सेप्टेम्बर (हि.स.)। सिक्किमका राज्यपाल ओमप्रकाश माथुर आज गान्तोकमा आयोजित सिक्किम मारवाडी समाजको १३५औँ स्थापना दिवस समारोहमा मुख्य अतिथिका रूपमा सहभागी भए। कार्यक्रममा सिक्किमका मुख्यमन्त्री प्रेमसिंह तामाङको पनि गरिमामय उपस्थिति रहेको थियो।
राजधानीको मनन केन्द्रमा आयोजित कार्यक्रममा मन्त्रिमण्डलका सदस्य, विधायक, जनप्रतिनिधि, अखिल भारतीय मारवाडी महासंघका पदाधिकारी, सिक्किम मारवाडी समाजका अध्यक्षसहित राज्यका विभिन्न स्थानबाट आएका प्रबुद्ध व्यक्ति तथा सर्वसाधारणको उपस्थिति रहेको थियो।
लोक भवनका अनुसार, समारोहका क्रममा अखिल भारतीय मारवाडी महासंघद्वारा राज्यपाल माथुरलाई अभिनन्दन गरियो। साथै, सिक्किम मारवाडी समाजले परम्परागत रूपमा ‘साफा’ पहिराएर राज्यपालको सम्मान तथा स्वागत गरेको थियो।
उपस्थित जनसमुदायलाई सम्बोधन गर्दै राज्यपाल माथुरले आफ्नो सम्बोधनको शुरुवात मारवाडी समुदायको उद्यमशीलता र साहसलाई उजागर गर्ने प्रसिद्ध भनाइ, “जहां न पहुंचे बैलगाड़ी, वहाँ पहुचें मारवाड़ी” बाट गरे।
समारोह आयोजना भएकोमा खुशी व्यक्त गर्दै राज्यपालले सिक्किमको आर्थिक तथा सामाजिक क्षेत्रमा मारवाडी समाजले १३५ वर्षदेखि पुर्याउँदै आएको अतुलनीय योगदानको प्रशंसा गरे। उनले एक शताब्दीभन्दा बढी समयको अवधिमा मारवाडी समाजले आफ्नो कडा मेहनत र समृद्ध विरासतका माध्यमबाट सिक्किममा विशिष्ट पहिचान कायम गरेको बताए। उनले मारवाडी समाज सिक्किममा आपसी सद्भावका साथ विभिन्न संस्कृतिमा घुलमिल हुँदै स्थानीय समुदायसँग काँधमा काँध मिलाएर विकसित सिक्किमको अभिन्न अंग बनिसकेको उल्लेख गरे।
सामूहिक प्रगतिका लागि एकताको भावना आवश्यक रहेको बताउँदै राज्यपालले मारवाडी समाजको ऐतिहासिक पृष्ठभूमिमाथि पनि प्रकाश पारे। उनले राजस्थानको भूमि मूलतः संघर्षको भूमि भएकाले मारवाडी समाजका मानिसहरू स्वभावैले संघर्षशील र मेहनती हुने बताए। उनले प्रारम्भिक चरणमा मारवाडी समुदायका पुर्खाहरूले कठिन चुनौती तथा प्रतिकूल परिस्थितिको सामना गर्दै दूरदराजका क्षेत्रमा त्यहाँको जनजीवनसँग सामञ्जस्य कायम गरेको र राज्यको विकासमा अमूल्य योगदान पुर्याएको उल्लेख गरे।
भविष्यको मार्ग देखाउँदै राज्यपाल माथुरले मारवाडी समाजलाई आफ्नो सामाजिक गतिविधिको दायरा विस्तार गर्न आह्वान गरे। उनले समुदाय केवल व्यापार तथा कारोबारमा मात्र सीमित नरही सामाजिक जीवन र जनकल्याणका कार्यमा पनि सक्रिय योगदान बढाउन आवश्यक रहेको बताए। राज्यपालले युवा तथा व्यवसायीहरूलाई नयाँ अवसरको खोजी गर्न र नवीन कार्य गर्न आह्वान गरे। देशले ‘विकसित भारत २०४७’ को लक्ष्य हासिल गर्दा त्यसमा सिक्किमको मारवाडी समाजको योगदान स्पष्ट रूपमा देखिनुपर्ने उनले बताए।
स्थापना दिवस समारोहमा विविध सांस्कृतिक कार्यक्रम पनि आयोजना गरिएको थियो। कार्यक्रममा राजस्थानको विविध तथा समृद्ध संस्कृतिको आकर्षक झलक प्रस्तुत गरिएको थियो।
हिन्दुस्थान समाचार / बिशाल
