औरैया, २२ सेप्टेम्बर (हि.स.)। उत्तर प्रदेशको औरैया जिल्लामा बुढ़वा मंगलका दिन पुरानो अछल्दा बजारमा मोटरसाइकलबाट मासु बेचिरहेका एक अधबैंसे व्यक्तिलाई स्थानीय बासिन्दाले पक्राउ गरी पुलिसको जिम्मा लगाएका छन्। घटनाको सूचना पाएपछि घटनास्थलमा पुगेको पुलिसले मोटरसाइकलबाट ६५.५०० किलो संदिग्ध मासु जफत गरेको छ। पुलिसले पशु चिकित्सा विभागलाई सूचना दिएर मासुको नमुना परीक्षणका लागि संकलन गरेको छ।
पक्रा परेको व्यक्तिको पहिचान इटावाको गाडीपुरा निवासी निशार अहमदको छोरा मुस्ताक अहमद (५९) का रूपमा भएको छ। उसले मोटरसाइकलमा मासु बोकेर क्षेत्रका विभिन्न स्थानमा घुम्दै बिक्री गरिरहेको थियो। यसै क्रममा गौ रक्षा दलका सदस्य जितेन्द्र सेंगर र सम्राट श्रीवास्तवले उसलाई पुरानो अछल्दा बजारमा मासु बेचिरहेको अवस्थामा पक्राउ गरेका हुन्।
सूचना पाएपछि उपनिरीक्षक जयप्रकाश पुलिसकर्मी सहित घटनास्थल पुगे र मासु कब्जामा लिए। त्यसपछि पशु चिकित्सा विभागलाई जानकारी गराइयो। पशु चिकित्सक सौरभ घटनास्थलमा पुगेर जफत मासुको नमुना संकलन गरे।
थाना प्रभारी सुरेश चन्द्रले मासुको नमुना परीक्षणका लागि मथुरा पठाइने बताए। परीक्षण रिपोर्ट आएपछि मात्र जफत मासु कुन पशुको हो भन्ने स्पष्ट हुने उनले बताए।
हिन्दुस्थान समाचार / भवानी थामी
