पलामू, २३ सेप्टेम्बर (हि.स.)। झारखण्डको पलामू जिल्लाको चैनपुर थाना क्षेत्रको दुलही गाउँमा बुधबार करमा पूजा विसर्जनका क्रममा कोयल नदीमा डुबेर चार युवकको मृत्यु भएको छ। चारजनाको शव फेला परेका छन्। एक जना बेपत्ता छन् भने उनको खोजी भइरहेको छ।
सूचना पाएलगत्तै पुलिस घटनास्थलमा पुगेको थियो। स्थानीयवासीको सहयोगमा नदीबाट चार युवकलाई बाहिर निकालियो। उनीहरूलाई उपचारका लागि एमएमसीएच लगिएको थियो, जहाँ चिकित्सकले उनीहरूलाई मृत घोषित गरे। मृतकहरूको पहिचान बाबुलाल सिंहका छोरा नितिश कुमार सिंह (१८), पुरानी ठाकुरका छोरा अमित कुमार ठाकुर (२२), सञ्जय सिंहका छोरा राजा सिंह (१२) र तिलकधारी पासवानका छोरा विशाल पासवान (१६) का रूपमा भएको छ। सुनील सिंहका छोरा हेमन्त कुमार सिंह (८) बेपत्ता छन्। उनीहरू सबै बोकेयाको पतरिया गाउँका बासिन्दा थिए।
प्रत्यक्षदर्शीहरूका अनुसार, बुधबार बिहान करिब ६ बजी ठूलो संख्यामा मानिसहरू करमा विसर्जनका लागि कोयल नदीको किनारमा पुगेका थिए। पतरिया गाउँका मानिसहरू घरबाट करिब डेढ किलोमिटर टाढा दुलही गाउँस्थित कोयल नदीको किनारमा विसर्जन गरिरहेका थिए। यसै क्रममा नितिश कुमार सिंह, अमित कुमार ठाकुर, राजा सिंह, विशाल पासवान र हेमन्त कुमार सिंहसहित अन्य युवकहरू नदीमा नुहाउन थाले।
अचानक सबै जना डुब्न थाले। घटनाको सूचना पाएपछि आसपासका मानिसहरू घटनास्थलमा जम्मा भए र चार युवकलाई जसोतसो नदीबाट बाहिर निकालियो। परिवारका सदस्यहरूले सबैलाई उपचारका लागि एमएमसीएच लगे, जहाँ चिकित्सकले उनीहरूलाई मृत घोषित गरे।
डाल्टनगञ्जका विधायक आलोक कुमार चौरसिया र पलामू सांसदका जिल्ला प्रतिनिधि विजय ओझा पनि घटनास्थल तथा अस्पताल पुगे। उनीहरूले घटनाबारे जानकारी लिए र दुर्घटनाप्रति गहिरो शोक व्यक्त गरेका छन्।
हिन्दुस्थान समाचार / भवानी थामी
