नयाँ दिल्ली, २३ सेप्टेम्बर (हि.स.)। भारतीय रेलवेको दक्षिण मध्य रेलवे (एससीआर) मा पहिलोपटक कवच ४.० सफलतापूर्वक सञ्चालनमा ल्याएर रेल सुरक्षा क्षेत्रमा महत्वपूर्ण उपलब्धि हासिल गरिएको छ। हैदराबाद मण्डलको मलकानगिरी-कामारेड्डी खण्डमा १०८ मार्ग किलोमिटरमा कवच ३.२ लाई उन्नत गरी कवच ४.० बनाइएको छ।
रेल मन्त्रालयले बुधबार जनाएको छ, दक्षिण मध्य रेलवेमा कवच ३.२ को १,४६५ मार्ग किलोमिटरमा प्रयोगबाट प्राप्त अनुभवका आधारमा कवच ४.० मा धेरै प्राविधिक सुधार गरिएको छ। यसलाई देशभर ठूलो स्तरमा लागू गर्ने योजना रहेको छ।
कवच ४.० मा रेलको स्थानको अझ सटीक जानकारी उपलब्ध गराउने क्षमता थपिएको छ। ठूला यार्डमा संकेतको अवस्थाबारे अझ राम्रो जानकारी, अप्टिकल फाइबर केबल (ओएफसी) मार्फत स्टेशनदेखि स्टेशनसम्म कवच अन्तरसम्बन्ध तथा विद्यमान विद्युतीय अन्तरसम्बन्ध प्रणालीसँग प्रत्यक्ष अन्तरसम्बन्धको सुविधा पनि यसमा समावेश गरिएको छ।
कवच स्वदेशमै विकसित स्वचालित रेल सुरक्षा (एटीपी) प्रणाली हो, जसले लोको पाइलटलाई निर्धारित गति सीमाभित्र रेल सञ्चालन गर्न मद्दत गर्छ र आवश्यक परेको अवस्थामा स्वचालित रूपमा ब्रेक लगाउन सक्छ। यसको उद्देश्य संकेत पार गर्ने अवस्था (एसपीएडी) रोक्न, महत्वपूर्ण परिस्थितिमा रेलको गति नियन्त्रण गर्न तथा ठक्करको जोखिम कम गर्न मद्दत गर्नु हो।
कवचका लागि स्टेशन तथा ब्लक खण्डहरूमा स्टेशन कवच, सम्पूर्ण ट्र्याकमा रेडियो फ्रिक्वेन्सी पहिचान (आरएफआईडी) ट्याग, सञ्चार टावर, रेलमार्गको किनारमा ओएफसी तथा रेलका इन्जिनमा लोको कवचजस्ता प्राविधिक सुविधाहरू स्थापना गर्नुपर्ने हुन्छ। रेल मन्त्रालयका अनुसार, यो सुरक्षा प्रणालीले उच्चतम सुरक्षा प्रमाणीकरण स्तर सेफ्टी इन्टिग्रिटी लेभल-४ (एसआईएल-४) का आवश्यकताहरू पूरा गर्छ।
रेल मन्त्रालयले दक्षिण मध्य रेलवेमा कवच ४.० को सफल सञ्चालन स्वदेशी रेल सुरक्षा प्रविधिलाई मजबुत बनाउने तथा भारतीय रेलवेका विभिन्न भागमा उन्नत स्वचालित रेल सुरक्षा प्रणालीको विस्तार गर्ने दिशामा महत्वपूर्ण कदम रहेको जनाएको छ।
हिन्दुस्थान समाचार / भवानी थामी
