आजमगढ़, २३ सेप्टेम्बर (हि.स.)। उत्तर प्रदेशको आजमगढ़ जिल्लाको अहरौला थाना क्षेत्रअन्तर्गत शम्भूपुर गाउँमा मंगलबार साँझ पूजा भइरहेका बेला पत्नी, एक बच्चा र दुई पुजारीको हत्या गर्ने आरोपी पुलिससँगको भिडन्तमा मारिएका छन्। घटनापछि पक्राउ पर्ने डरले आरोपीले आफ्ना तीन बच्चासहित आफूलाई एउटा कोठामा थुनेका थिए।
उनलाई बाहिर निकाल्न पुलिसले करिब आठ घण्टासम्म प्रयास गरेको थियो। यस क्रममा उनले आफ्ना एक छोरालाई समेत गोली हानेर हत्या गरेका थिए। त्यसपछि पुलिसले ढोका तोडेर कोठाभित्र प्रवेश गर्दा आरोपीले पुलिसमाथि गोली चलाए। जवाफी कारबाहीमा उनी मारिएका हुन्। पुलिसले अन्य दुई बच्चालाई सुरक्षित उद्धार गरेको छ।
वरिष्ठ पुलिस अधीक्षक डा. अनिल कुमारका अनुसार, शम्भूपुर गाउँका अरविन्द सिंहको घरमा मंगलबार साँझ पूजा भइरहेको थियो। अरविन्दले पूजाको विरोध गर्दै त्यहाँ उपस्थित पुजारीहरूसँग आधार कार्ड मागेपछि विवाद भएको थियो। विवाद बढ्दै गएपछि उनले पेस्तोलबाट गोली चलाए। गोली लागेर उनकी पत्नी बबिता तथा पुजारी महेन्द्र पाठक र अखिलेश मिश्रा घाइते भए। अस्पताल पुर्याएपछि चिकित्सकले उनीहरूलाई मृत घोषणा गरेका थिए।
घटनापछि अरविन्द आफ्ना तीन बच्चासहित घरको एउटा कोठामा थुनिएका थिए। अवस्था गम्भीर बनेपछि वाराणसी क्षेत्रका अतिरिक्त पुलिस महानिरीक्षक नवीन अरोड़ा, पुलिस उपमहानिरीक्षक सुनील कुमार तथा वरिष्ठ पुलिस अधीक्षक डा. अनिल कुमारसहितको टोली घटनास्थल पुगेको थियो। पुलिसले परिवारका सदस्य तथा छिमेकीको सहयोगमा उनलाई कोठाबाट बाहिर निकाल्ने प्रयास गरे पनि सफल हुन सकेन।
अबेर राति एटीएस र विशेष कार्यदलको टोलीसमेत घटनास्थलमा बोलाइयो। पुलिसले बच्चाहरूलाई सुरक्षित बाहिर निकाल्ने प्रयास गरिरहेका बेला कोठाभित्रबाट गोली चलेको आवाज सुनियो। त्यसपछि पुलिसले ढोका तोडेर भित्र प्रवेश गरेको थियो। पुलिसका अनुसार, अरविन्दले लगातार पाँच-छ राउन्ड गोली चलाएपछि जवाफी कारबाही गरिएको थियो। गोली लागेर उनी घाइते भएका थिए। उनको काखबाट एक बच्ची पनि खसेर घाइते भएकी थिइन्। अर्की छोरीलाई उनले आफ्नो नियन्त्रणमा राखेका थिए।
पुलिसले दुवै बच्चालाई सुरक्षित बाहिर निकालेर घाइते अरविन्द र उनका छोरा शौर्यलाई उपचारका लागि अस्पताल पुर्यायो। अस्पतालमा चिकित्सकले दुवैलाई मृत घोषणा गरे। यससँगै घटनामा मृत्यु हुनेको संख्या पाँच पुगेको छ।
पुलिसका अनुसार, घटनाबारे स्थानीयवासीसँग गरिएको सोधपुछबाट अरविन्द लामो समयदेखि मानसिक तनावमा रहेको र उनको व्यवहार असामान्य रहने गरेको जानकारी प्राप्त भएको छ। उनी परिवारका सदस्य तथा गाउँलेसँग पटक-पटक झगडा तथा कुटपिट गर्ने गरेको बताइएको छ। यही कारण उनकी आमा र पत्नीले उनलाई भूतप्रेतको बाधा भएको आशंका गर्दै घरमै पाँच दिने पूजा तथा अनुष्ठानको आयोजना गरेका थिए।
चार दिनदेखि अनुष्ठान चलिरहेको अवस्थामा मंगलबार अरविन्दले त्यसको विरोध गर्दै पत्नी र दुई पुजारीमाथि गोली चलाएको पुलिसले जनाएको छ। त्यसपछि उनले आफ्ना तीन बच्चासहित आफूलाई कोठामा बन्द गरेका थिए।
हिन्दुस्थान समाचार / भवानी थामी
