नयाँ दिल्ली, २५ सेप्टेम्बर (हि.स.)। प्रधानमन्त्री नरेन्द्र मोदीले शुक्रवार ‘सुभाषितम्’ अन्तर्गत सफलता, नवाचारका लागि निरन्तर प्रयास, दृढ़ता र समर्पित कार्यको महत्त्वमा जोड दिएका छन्। उनले भारतीय जनसङ्घका संस्थापक सदस्य पण्डित दीनदयाल उपाध्यायलाई उनको जयन्तीका अवसरमा श्रद्धाञ्जली अर्पण गरेका छन्।
प्रधानमन्त्री मोदीले सामाजिक सञ्जालमा संस्कृतको एक श्लोक साझा गर्दै लेखेका छन्, “‘यथा यथा प्रयत्नः स्याद्भवेदशु फलं तथा। इति पौरुषमेवस्ति दैवमस्तु तदेव च॥’ यसको भावार्थ हो—कुनै व्यक्तिको प्रयास र लगन जति बढ़ी हुन्छ, सफलता त्यति नै चाँड़ो प्राप्त हुन्छ। नवाचार पनि निरन्तर प्रयासमा आधारित हुन्छ। त्यसैले भाग्य होइन, समर्पित कार्य, साहस र नयाँ विचारलाई वास्तविकतामा परिणत गर्ने दृढ़ सङ्कल्पले नै सफलता र नवाचारको मार्ग प्रशस्त गर्छ।”
उनले राष्ट्रसेवाका साझेदार पण्डित दीनदयाल उपाध्यायलाई उनको जयन्तीका अवसरमा श्रद्धापूर्वक नमन गरेका छन्। उनले समाजको अन्तिम पङ्क्तिमा रहेका व्यक्तिको उत्थानलाई राष्ट्र निर्माणको आधार मानेका र ‘अन्त्योदय’को यस्तो सिद्धान्त दिएका थिए, जसले आज पनि जनकल्याणका लागि प्रेरणा प्रदान गरिरहेको प्रधानमन्त्री मोदीले बताएका छन्।
प्रधानमन्त्रीले यस विशेष अवसरमा पण्डित उपाध्यायका विचार र आदर्शलाई आत्मसात् गर्दै सामाजिक तथा राष्ट्रिय कार्यप्रति समर्पित हुने सङ्कल्प गर्न आह्वान गरेका छन्।
उल्लेखनीय छ, पण्डित दीनदयाल उपाध्यायको जयन्ती अर्थात् २५ सेप्टेम्बरलाई देशभरि ‘अन्त्योदय दिवस’का रूपमा मनाइन्छ।
हिन्दुस्थान समाचार / भवानी थामी
