नयाँ दिल्ली, २६ सेप्टेम्बर (हि.स.)। पूर्व प्रधानमन्त्री डा. मनमोहन सिंहको जयन्तीका अवसरमा प्रधानमन्त्री नरेन्द्र मोदी, लोकसभा अध्यक्ष ओम बिरला, रक्षामन्त्री राजनाथ सिंह, कांग्रेस अध्यक्ष मल्लिकार्जुन खरगे तथा कांग्रेस महासचिव प्रियंका गान्धी वाड्रा सहित विभिन्न नेताहरूले उनीप्रति श्रद्धाञ्जली अर्पण गरेका छन्। डा. मनमोहन सिंहको जन्म २६ सेप्टेम्बर १९३२ मा भएको थियो।

प्रधानमन्त्री नरेन्द्र मोदीले सामाजिक सञ्जाल ‘एक्स’ मार्फत डा. सिंहलाई स्मरण गर्दै उनले आफ्नो लामो सार्वजनिक जीवनमा पूर्ण निष्ठाका साथ देशको सेवा गरेको बताए। प्रधानमन्त्रीले राष्ट्रप्रति डा. सिंहको योगदानलाई स्मरण गरे। गत वर्ष पनि प्रधानमन्त्री मोदीले डा. सिंहको जयन्तीका अवसरमा उनको सार्वजनिक जीवन तथा देशका लागि योगदानलाई स्मरण गर्दै श्रद्धाञ्जली अर्पण गरेका थिए।

लोकसभा अध्यक्ष ओम बिरलाले डा. मनमोहन सिंहप्रति श्रद्धाञ्जली अर्पण गर्दै उनको दीर्घ सार्वजनिक जीवन र नेतृत्वको भूमिका सदैव उल्लेखनीय रहने बताए।

रक्षामन्त्री राजनाथ सिंहले सार्वजनिक जीवन तथा भारतको प्रगतिमा डा. मनमोहन सिंहको योगदानलाई सधैँ स्मरण गरिने बताए।

कांग्रेस अध्यक्ष मल्लिकार्जुन खरगेले डा. मनमोहन सिंहको विनम्रता, इमानदारी र समझदारी उनको सार्वजनिक जीवनको पहिचान रहेको बताए। उनले शालीनता र संवेदनशीलताका साथ नेतृत्व गर्दै समावेशी विकास तथा समाजका कमजोर वर्गको कल्याणलाई शासनको केन्द्रमा राखेको बताए। खरगेले जनसेवा, समावेशी विकास र सुधारको उनको विरासतले आगामी पुस्तालाई प्रेरणा दिइरहने बताए।

कांग्रेस महासचिव प्रियंका गान्धी वाड्राले कुशल अर्थशास्त्री तथा सफल राजनीतिज्ञका रूपमा डा. मनमोहन सिंहले भारतको विकासलाई गति दिँदै देशको समृद्धिलाई नयाँ उचाइमा पुर्याएको बताइन्। उनका दूरदर्शी तथा समावेशी आर्थिक नीति र देशको विकासमा योगदानलाई सधैँ स्मरण गरिने उनले बताइन्।

डा. मनमोहन सिंह सन् २००४ देखि २०१४ सम्म भारतका प्रधानमन्त्री रहेका थिए। यसअघि उनी अर्थमन्त्री सहित विभिन्न महत्वपूर्ण पदमा रहेका थिए भने भारतीय रिजर्भ बैंकका गभर्नर समेत भएका थिए। उनको निधन २६ दिसम्बर २०२४ मा ९२ वर्षको उमेरमा भएको थियो।

/ बिशाल