देहरादून, २६ सेप्टेम्बर (हि.स.)। उत्तराखण्डमा मौसम विभागले रेड अलर्ट जारी गरेको तथा मौसम प्रतिकूल बनेपछि तीर्थयात्रीको सुरक्षालाई ध्यानमा राख्दै चारधाम यात्रा शनिवार दिउँसोदेखि २७ सेप्टेम्बरसम्म स्थगित गरिएको छ। चारधाम यात्रा व्यवस्थापन तथा नियन्त्रण संगठनका आयुक्त आनन्द स्वरूपले गढवाल मण्डलका सबै जिल्लाधिकारीलाई यात्रा स्थगित गर्ने सम्बन्धमा आवश्यक निर्देश जारी गरेका छन्।

मौसम विज्ञान केन्द्रबाट २६ सेप्टेम्बरमा प्राप्त सूचना तथा राज्य आपत्कालीन सञ्चालन केन्द्रको पूर्वानुमानमा रेड अलर्ट जारी भएपछि उक्त निर्णय लिइएको हो। आदेशमा देश-विदेशबाट चारधाम दर्शनका लागि आउने श्रद्धालु तथा यात्रुको सुरक्षा सर्वोच्च प्राथमिकता रहेको उल्लेख गरिएको छ।

जिल्लाधिकारीहरूलाई आ-आफ्ना जिल्लामा यात्रा स्थगित गर्ने आदेशको कड़ाइका साथ पालना गराउन तथा यात्रा मार्गमा आवश्यक सुरक्षा व्यवस्था कायम राख्न निर्देश दिइएको छ। मौसम सामान्य भएपछि यात्रा पुनः सञ्चालन गर्न आवश्यक तयारी सुनिश्चित गर्न पनि भनिएको छ। साथै अर्को आदेश नभएसम्म यात्रा दर्ता स्थगित राख्न आवश्यक कारबाही गर्न निर्देश दिइएको छ।

रुद्रप्रयाग जिल्ला प्रशासनले पनि रेड अलर्टलाई ध्यानमा राख्दै केदारनाथ धाम यात्रा २६ सेप्टेम्बर दिउँसोदेखि २७ सेप्टेम्बरसम्म स्थगित गरेको छ। जिल्लाधिकारी तथा जिल्ला विपद् व्यवस्थापन प्राधिकरणका अध्यक्ष विशाल मिश्राले श्रद्धालुहरूको सुरक्षालाई ध्यानमा राखेर यो निर्णय गरिएको बताए।

उनले यात्रा मार्गका सबै क्षेत्रीय अधिकारी, जाँच चौकी तथा क्षेत्रीय मजिस्ट्रेटहरूलाई आदेशको कड़ाइका साथ पालना सुनिश्चित गर्न निर्देश दिएका छन्। प्रशासनले मौसमको अवस्थामाथि निरन्तर निगरानी राखिरहेको जनाएको छ।

अधिकारीहरू अनुसार, मौसममा सुधार आई परिस्थिति अनुकूल भएपछि चारधाम यात्रा पुनः सञ्चालन गर्नेबारे निर्णय गरिनेछ। प्रशासनले श्रद्धालुहरूलाई मौसम विभागका चेतावनी तथा स्थानीय प्रशासनका निर्देशन पालना गर्न अपील गरेको छ।

हिन्दुस्थान समाचार / भवानी थामी