नयाँ दिल्ली, २७ सेप्टेम्बर (हि.स.)। प्रधानमन्त्री नरेन्द्र मोदीले आइतवार आफ्नो मासिक रेडियो कार्यक्रम ‘मन की बात’ मा भारतले विश्व समुदाय सामू आतंकवाद कुनै पनि हालतमा सहन नगर्ने र आतंकवादी घटनाको कड़ा जवाफ दिइने स्पष्ट सन्देश दिएको बताएका छन्। पाकिस्तान विरुद्ध गरिएको सर्जिकल स्ट्राइकको एक दशक पूरा भएको अवसरमा उनले उक्त कुरा भनेका हुन्।
‘मन की बात’ को १३८औँ एपिसोडमा मोदीले भारत अहिले आतंकवाद विरुद्ध शून्य सहनशीलताको नीतिमा अघि बढ़िरहेको बताए। पछिल्लो एक दशकमा बालाकोट हवाई आक्रमणदेखि लिएर ‘अपरेशन सिन्दूर’सम्म भारतले पटक–पटक आतंकवाद विरुद्ध कड़ा जवाफ दिने आफ्नो नीति स्पष्ट गरेको उनले उल्लेख गरे।
सर्जिकल स्ट्राइकको स्मरण गर्दै प्रधानमन्त्रीले यसले विश्वसामू भारतको आतंकवादविरोधी नीतिको नयाँ उदाहरण प्रस्तुत गरेको बताए। आतंकवादी आक्रमणका कारण भारतले लामो समयसम्म पीड़ा भोगेको र सर्जिकल स्ट्राइक त्यस पीड़ा विरुद्ध भारतको निर्णायक प्रतिक्रिया भएको उनले उल्लेख गरे।
प्रधानमन्त्री अनुसार, १० वर्षअघि २८–२९ सेप्टेम्बरमा भारतीय सेनाले पाकिस्तानमा रहेका आतंकवादी शिविरलाई लक्षित गरी सर्जिकल स्ट्राइक गरेको थियो। आतंकवाद विरुद्ध भारतीय सेनाका वीर जवानहरूले गरेको उक्त कारबाहीले विश्वलाई आश्चर्यचकित बनाएको उनले बताए।
हिन्दुस्थान समाचार / भवानी थामी
