गान्तोक, 27 सेप्टेम्बर (हि.स.)। विश्व पर्यटन दिवसको अवसरमा युक्सम र आरिटारका महिला नेतृत्वमा सञ्चालित होमस्टेका सञ्चालकहरूका लागि आयोजित डिजिटल बजारीकरण तथा व्यवसाय प्रबन्धन प्रशिक्षण कार्यक्रमको समापन समारोह आज पर्यटन तथा नागरिक उड्डयन विभागको सम्मेलन कक्षमा सम्पन्न भयो। कार्यक्रममा विभागीय मन्त्री छिरिङ टी. भोटिया मुख्य अतिथिका रूपमा उपस्थित थिए।
समारोहलाई सम्बोधन गर्दै मन्त्री भोटियाले विश्व पर्यटन दिवसको अवसरमा जनचेतना अभिवृद्धि गर्ने उद्देश्यले सबै जिल्लामा दिवस मनाउन निर्देशन दिइएको बताए। उनले यस वर्ष विश्व पर्यटन दिवसको विषयअनुरूप डिजिटल बजारीकरण तथा व्यवसाय प्रबन्धन प्रशिक्षणजस्ता कार्यक्रम सञ्चालन गर्नु महत्वपूर्ण रहेको बताए।
उनले तीव्र गतिमा परिवर्तन भइरहेको डिजिटल परिवेशअनुसार पर्यटन क्षेत्रले आफूलाई अनुकूल बनाउनुपर्ने र कार्यक्षमता बढाउन कृत्रिम बौद्धिकताको प्रभावकारी प्रयोग गर्नुपर्नेमा जोड दिए। उनले राष्ट्रिय तथा अन्तरराष्ट्रिय बजारसम्म व्यवसायको पहुँच विस्तार गर्न बलियो डिजिटल उपस्थिति आवश्यक रहेको पनि बताए।
मन्त्री भोटियाले मुख्यमन्त्री प्रेमसिंह तामाङको नेतृत्वमा शुरु गरिएको राज्य सरकारको मेगा होमस्टे पहलको प्रशंसा गरे। ग्रामीण पर्यटनमा केन्द्रित यस प्रमुख कार्यक्रमअन्तर्गत १ हजारभन्दा बढी मापदण्डयुक्त होमस्टे स्थापना गर्नुका साथै स्थानीय समुदायका लागि दिगो जीविकोपार्जनका अवसर सिर्जना
सिक्किमको समृद्ध प्राकृतिक सौन्दर्य, परम्परा, संस्कृति, सम्पदा तथा खानालाई पर्यटन प्रवर्द्धनका प्रमुख आधारका रूपमा उल्लेख गर्दै उनले सशक्त पर्यटन वातावरणबाट सिर्जना हुने आर्थिक अवसरमाथि पनि प्रकाश पारे। उनले राज्यभर होमस्टे व्यवसायलाई व्यावसायिक र विस्तारयोग्य बनाउने उद्देश्यले सञ्चालन गरिएको प्रशिक्षण प्राप्त ज्ञानलाई पूर्ण रूपमा प्रयोग गरी आफ्नो व्यवसायलाई थप सुदृढ र विस्तार गर्न सञ्चालकलाई आग्रह गरे।
हिन्दुस्थान समाचार / बिशाल
27 Sep 2026
