तेहरान, २६ सेप्टेम्बर (हि.स.)। ईरानको इस्लामिक रिभोल्युसनरी गार्ड्स कोर्प्स (आईआरजीसी) ले होर्मुज जलडमरूमध्यमा जासुसी गतिविधिमा संलग्न रहेको अमेरिकाको अर्को एउटा अटोनोमस अन्डरवाटर भेहिकल (एयूभी) नियन्त्रणमा लिएर जफत गरेको दाबी गरेको छ। सेप्टेम्बर महिनापछि यस्तो प्रकारको यो दोस्रो कारबाही भएको बताइएको छ।
ईरान सरकारको अन्तरराष्ट्रिय समाचार सञ्जाल प्रेस टीभीका अनुसार, आईआरजीसी नौसेनाले आइतबार जारी गरेको विज्ञप्तिमा आफ्नो बलले गोप्य सूचना तथा इलेक्ट्रोनिक युद्ध क्षमताको प्रयोग गर्दै “समन्वित र जटिल अपरेशन” मार्फत अमेरिकी अन्डरवाटर ड्रोन नियन्त्रणमा लिएको जनाएको छ। आईआरजीसीका अनुसार, उक्त ड्रोन होर्मुज जलडमरूमध्यमा निगरानी तथा जासुसी गतिविधिमा संलग्न थियो।
ईरानी बलले जफत गरिएको ड्रोनको पहिचान ‘रेमस ६००’ का रूपमा गरेको छ। यो एक उन्नत अटोनोमस अन्डरवाटर भेहिकल हो, जसलाई चालकविना समुद्रभित्र विभिन्न अभियानका लागि सञ्चालन गर्न सकिन्छ। आईआरजीसीले उक्त ड्रोन अहिले आफ्ना विशेषज्ञहरूको नियन्त्रणमा रहेको र त्यससँग सम्बन्धित जानकारी संकलन तथा विश्लेषणको काम भइरहेको जनाएको छ।
आईआरजीसी नौसेनाले आफ्नो विज्ञप्तिमा होर्मुज जलडमरूमध्य बन्द रहेको उल्लेख गर्दै जलमार्गमा हुने “खतरनाक गतिविधि तथा अनुमति बिना हुने आवागमन” विरुद्ध कारबाही जारी रहने पनि जनाएको छ।
यसअघि सेप्टेम्बर महिनामै आईआरजीसी नौसेनाले होर्मुज जलडमरूमध्यको प्रवेशद्वार नजिक अमेरिकाको अर्को उन्नत मानवरहित अन्डरवाटर भेहिकल नियन्त्रणमा लिएर जफत गरेको दाबी गरेको थियो। उक्त प्रणालीको पहिचान ‘डाइभ एलडी’ का रूपमा गरिएको थियो।
आईआरजीसीका अनुसार, डाइभ एलडी अमेरिकी रक्षा प्रविधि कम्पनी एन्डुरिल इन्डस्ट्रिजद्वारा विकसित गरिएको हो र यसलाई अमेरिकी नौसेनाको मानवरहित अन्डरसी भेहिकल कार्यक्रमअन्तर्गत प्रयोग गरिन्छ।
हिन्दुस्थान समाचार / बिशाल
