देहरादून, २८ सेप्टेम्बर (हि.स.)। उत्तराखण्डको उत्तरकाशी जिल्ला स्थित कालिन्दी ट्रेक क्षेत्रमा खराब मौसमका कारण फसेका ट्रेकरहरूलाई सुरक्षित उद्धार गर्न सोमवार पनि बचाउ अभियान जारी रह्यो। विपद् व्यवस्थापन विभाग अनुसार, हालसम्म २५ जनालाई सुरक्षित उद्धार गरिएको छ। उद्धार अभियानमा चारवटा हेलिकोप्टर परिचालन गरिएको छ।

उद्धार अभियानका क्रममा एउटा हेलिकोप्टर हर्षिल हेलिप्याडमा अवतरण गरी त्यहाँबाट अडेन कोलतर्फ गएको छ। अन्य दुई हेलिकोप्टर पनि हर्षिल पुगेका छन्। राज्य विपद् प्रतिकार्य बलको विशेषज्ञ उच्च हिमाली उद्धार टोली पनि अभियानमा संलग्न छ।

राज्य आपत्कालीन सञ्चालन केन्द्रबाट सोमवार प्राप्त जानकारी अनुसार, उत्तरकाशी र बागेश्वर जिल्लाका उच्च हिमाली ट्रेकिङ मार्गमा फसेका वा रहेका १४९ जना ट्रेकर्स तथा सहयोगी कर्मचारीको अवस्था सुरक्षित रहेको बताइएको छ। उपलब्ध विवरण अनुसार उत्तरकाशीका विभिन्न पदयात्रा मार्गमा कूल १०६ जना छन् भने बागेश्वरको पिण्डारी हिमनदी क्षेत्रमा ४३ जना रहेका छन्।

उत्तरकाशीको कालिन्दी पास ट्रेक अन्तर्गत दलाङ्दी आधार शिविरमा पाँच सदस्य र १३ सहयोगी कर्मचारी गरी १८ जना रहेका छन्। रिपोर्टमा उनीहरू सबै सुरक्षित रहेको उल्लेख छ। माउन्ट सुदर्शनको तपोवन आधार शिविरमा चार विदेशी तथा तीन सहयोगी कर्मचारी गरी सात जना रहेका छन्। त्यहाँ तीव्र हावा चलिरहेको बताइएको छ।

माउन्ट भागीरथी–२ मा सेनाको टोलीका १० पर्वतारोही र १० सहयोगी कर्मचारी गरी २० जना रहेका छन्। त्यस्तै, नन्दनवनमा माउन्ट भागीरथी–२ का छह सदस्य र तीन सहयोगी कर्मचारी गरी नौ जना रहेका छन्। माउन्ट जोगिन–१ मा दुई सदस्य र तीन सहयोगी कर्मचारी रहेका छन्।

माउन्ट शिवलिङ्गको तपोवन आधार शिविरमा दुई विदेशी र तीन सहयोगी कर्मचारी गरी पाँच जना रहेका छन्। यस बाहेक माउन्ट शिवलिङ्गबाट तीन सहयोगी कर्मचारी आधार शिविर फर्किसकेका छन्। माउन्ट सतोपन्थमा पाँच सदस्य र तीन सहयोगी कर्मचारी गरी आठ जना रहेका छन्। अडेन कोल पासको आधार शिविरमा पाँच भारतीय र २३ सहयोगी कर्मचारी गरी कूल २९ जना रहेका छन्। त्यहाँ पनि तीव्र हावा चलिरहेको सूचना प्राप्त भएको छ।

बागेश्वर जिल्लाको पिण्डारी हिमनदी क्षेत्रमा २३ जना र खाती गाउँमा २० जना गरी कुूल ४३ जना रहेका छन्। उनीहरू सबै सुरक्षित रहेको बताइएको छ।

यसैबीच, रुद्रप्रयाग जिल्लाको केदारनाथ यात्रा मार्ग अन्तर्गत चीड़बासा पहिरो प्रभावित क्षेत्रमा राति पहिरोका कारण फसेका लगभग १,५०० यात्रुलाई राज्य विपद् प्रतिकार्य बल, राष्ट्रिय विपद् प्रतिकार्य बल र जिल्ला विपद् प्रतिकार्य बलको संयुक्त टोलीले सुरक्षित उद्धार गरी गौरीकुण्ड पुर्याएको छ।

रुद्रप्रयाग जिल्ला विपद् नियन्त्रण कक्षबाट २७ सेप्टेम्बरको राति सोनप्रयाग पुलिसलाई गौरीकुण्डबाट लगभग तीन किलोमिटर अगाड़ी चीड़बासा क्षेत्रमा पहिरोका कारण धेरै यात्रु बाटोको अर्को भागमा फसेको सूचना प्राप्त भएको थियो। सूचना पाएलगत्तै उपनिरीक्षक आशीष डिमरीको नेतृत्वमा सोनप्रयाग स्थित राज्य विपद् प्रतिकार्य बलको टोली घटनास्थलतर्फ गयो।

चीड़बासा हेलिप्याड नजिक पुगेपछि उद्धार टोलीले बाटोमा पहिरोको माटो तथा ढुंगामाटो थुप्रिएको पाएको थियो। पहाड़बाट लगातार ढुंगा खसिरहेकाले यात्रुहरूको आवाजाही जोखिमपूर्ण बनेको थियो। अवस्थालाई ध्यानमा राख्दै राज्य विपद् प्रतिकार्य बल, राष्ट्रिय विपद् प्रतिकार्य बल र जिल्ला विपद् प्रतिकार्य बलको टोलीले संयुक्त रूपमा उद्धार अभियान शुरु गऱ्यो।

उद्धार टोलीले यात्रुहरूको सुरक्षालाई प्राथमिकता दिँदै उनीहरूलाई सावधानीपूर्वक पहिरो प्रभावित क्षेत्र पार गराएको थियो। अभियानका क्रममा लगभग १,५०० यात्रुलाई सुरक्षित रूपमा बाटोको अर्को भागमा पुर्याइएपछि गौरीकुण्डतर्फ पठाइयो। लगातार ढुंगा खस्ने र पहिरोको जोखिमबीच संयुक्त टोलीले आपसी समन्वयमा उद्धार अभियान सम्पन्न गरेको हो।

/ बिशाल