नयाँ दिल्ली, 0३ सेप्टेम्बर (हि.स.)। भारतका प्रधानमन्त्री नरेन्द्र मोदीले गुजराती संगीतकार गौरङ्ग व्यासको निधनप्रति गहिरो दुःख व्यक्त गरेका छन्।

प्रधानमन्त्री मोदीले सामाजिक सञ्जाल एक्समा लेखेका छन्, “गुजराती संगीत जगतका प्रतिष्ठित संगीतकार गौरङ्ग व्यासको निधनले हामीलाई अत्यन्त दुःखी बनाएको छ। आफ्ना पिता अविनाश व्यासको समृद्ध सांगीतिक परम्परालाई अगाडि बढाउँदै उहाँले गुजराती संगीत क्षेत्रमा विशिष्ट पहिचान स्थापित गर्नुभएको थियो। उहाँको निधनसँगै गुजरातले एक प्रतिभाशाली कलाकार गुमाएको छ। गुजराती संगीतमा उहाँले पुर्याउनुभएको अमूल्य योगदान सधैं स्मरणीय रहनेछ। दिवंगत आत्माको चिरशान्तिको कामना गर्दै शोकसन्तप्त परिवार तथा उहाँका असंख्य प्रशंसकप्रति हार्दिक समवेदना व्यक्त गर्दछु। ॐ शान्ति।”

उल्लेखनीय छ, गुजराती चलचित्र जगतका प्रख्यात संगीतकार तथा गीतकार स्वर्गीय अविनाश व्यासका पुत्र गौरङ्ग व्यासको बुधबार राति अहमदाबादमा निधन भएको हो। उहाँको निधनको खबर सार्वजनिक हुनासाथ गुजराती चलचित्र तथा संगीत क्षेत्रमा शोकको लहर फैलिएको छ।

गौरङ्ग व्यास लामो समयदेखि गुजराती संगीत क्षेत्रमा सक्रिय रहँदै आएका थिए र उनले १०० भन्दा बढी गुजराती चलचित्रमा संगीत निर्देशन गरेका थिए।

हिन्दुस्थान समाचार / भवानी थामी