नयाँ दिल्ली, ३० सेप्टेम्बर (हि.स.)। प्रवर्तन निदेशनालय (ईडी)ले फर्जी कर्पोरेट सामाजिक उत्तरदायित्व (सीएसआर) दान मामिलामा बुधवार देशका चार राज्यका आठ स्थानमा एकैसाथ खोजी अभियान चलाएको छ। ईडीको मुम्बई क्षेत्रीय कार्यालयको टोलीले महाराष्ट्रमा पाँच, पश्चिम बंगालमा एक, गुजरातमा एक तथा दिल्ली–एनसीआरमा एक स्थानमा खोजी गरिरहेको छ। यो कारबाही डा. धर्मेन्द्र कुमार तथा अन्यविरुद्ध दर्ता गरिएको मामिलामा भइरहेको हो।

ईडीको खोजी अभियानमा बजार सञ्चालक, ट्रस्टी तथा मिडलम्यानसँग सम्बन्धित परिसरहरू पनि समेटिएका छन्। अनुसन्धान एजेन्सी अनुसार, हालसम्मको प्रारम्भिक अनुसन्धानमा सयौँ करोड़ रुपियाँको कथित फर्जी सीएसआर सञ्जाल फेला परेको छ। यस सञ्जाल मार्फत अनिवार्य सीएसआर योगदानको रकम कमिशन लिएर सम्बन्धित कम्पनी वा दातासम्म फिर्ता पुर्याउने व्यवस्था गरिएको पाइएको छ।

अनुसन्धानका क्रममा ईडीले सीएसआर रकम एक ठाउँबाट अर्को ठाउँमा स्थानान्तरण गरी अन्ततः दातासम्म फिर्ता पुर्याउने उद्देश्यले कथित रूपमा विशेष रूपमा गठन गरिएका ट्रस्टबारे जानकारी पाएको छ। एजेन्सी अनुसार, यी ट्रस्ट मार्फत सीएसआरका नाममा दिइएको रकमबाट कमिशन कटौती गरी बाँकी रकम पुनः दातासम्म पुर्याइन्थ्यो।

ईडी अनुसार, खोजीको दायरामा कथित सञ्जालसँग सम्बन्धित बजार सञ्चालक, ट्रस्टी तथा मिडलम्यानहरू समावेश छन्। यी परिसरबाट जफत भएका कागजात तथा विद्युतीय उपकरणहरूको जाँच भइरहेको छ। उपकरणको फरेन्सिक परीक्षण तथा त्यसबाट प्राप्त जानकारीका आधारमा मामिलाका थप कड़ी जोड्ने काम भइरहेको छ। ईडीले विद्युतीय उपकरणको जाँच तथा मामिलामा थप सोधपुछ जारी रहेको जनाएको छ।

हिन्दुस्थान समाचार / भवानी थामी