कोलकाता, ३० सेप्टेम्बर (हि.स.)। कलकत्ता उच्च अदालतले नन्दीग्राम उपनिर्वाचनमा कांग्रेस उम्मेदवार मिलन प्रधानलाई दिएको अन्तरिम जमानत विरुद्ध पश्चिम बंगाल सरकारले बुधवार सर्वोच्च अदालतमा याचिका दिएको छ। राज्य सरकारका तर्फबाट सोलिसिटर जनरल तुषार मेहताले सर्वोच्च अदालतमा उक्त फैसलालाई चुनौती दिँदै मुद्दाको तत्काल सुनवाइ गर्न आग्रह गरे। उनले प्रधान हत्या जस्तो गम्भीर मुद्दामा आरोपी रहेको र उनीमाथि अन्य सामान्य नागरिक सरह कानूनी कारबाही हुनुपर्ने तर्क गरे। केवल चुनाउ लड़िरहेका कारण उनलाई विशेष छुट दिन नसकिने उनको भनाइ थियो। यद्यपि, प्रधानन्यायाधीश सूर्यकान्तले बिहिवार तत्काल सुनवाइको आग्रह अस्वीकार गरेका छन्। अदालतले सूचीमा यसअघि नै धेरै मुद्दा विचाराधीन रहेकाले अब यस याचिकामा आगामी सोमवार सुनवाइ हुने स्पष्ट पारेको छ।

राज्य सरकारको यो कदमको कांग्रेसलाई पहिले नै आशङ्का थियो। त्यसैले कानूनी प्रतिरक्षाका लागि कांग्रेस उम्मेदवार मिलन प्रधानले बुधवार नै सर्वोच्च अदालतमा चार वटा मुद्दामा क्याभिएट दर्ता गराएका छन्। यसको अर्थ अब सर्वोच्च अदालतले राज्य सरकारको तर्क मात्र सुनेर एकतर्फी आदेश जारी गर्न सक्नेछैन। अन्तरिम जमानतलाई चुनौती दिने यस याचिकामा कुनै निर्णय गर्नुअघि अदालतले कांग्रेस उम्मेदवारको पक्ष पनि अनिवार्य रूपमा सुन्नुपर्नेछ।

उल्लेखनीय छ, मंगलवार कलकत्ता उच्च अदालतका न्यायमूर्ति तीर्थंकर घोषले मिलन प्रधानलाई चुनाउ लड्ने अवसर प्रदान गर्दै तीन साताका लागि अन्तरिम जमानत दिएका थिए। अदालतले उनी विरुद्ध दर्ता भएका सबै छह वटा मुद्दामा राहत दिँदै चुनावी प्रक्रिया पूरा भएपछि हल्दिया अदालतमा आत्मसमर्पण गर्नुपर्ने सर्त राखेको थियो। यसका साथै उनले प्रत्येक दिन बिहान साढ़े आठ बजी र राति साढ़े नौ बजी सम्बन्धित अनुसन्धान अधिकारीलाई फोन गरेर आफ्नो उपस्थिति जनाउनुपर्नेछ। प्रधानलाई १९ सेप्टेम्बरमा २००७ को भूमि अधिग्रहणविरोधी आन्दोलनका क्रममा दर्ता भएका हत्या, हत्याको प्रयास र लुटपाट जस्ता पुराना मुद्दामा पक्राउ गरिएको थियो।

यस कानुनी विवादबीच नन्दीग्रामको राजनीतिक माहोल बुधवार बिहान अझ् तातेको छ। पुलिसले कांग्रेसका दुई प्रमुख नेतालाई हिरासतमा लिएको छ। मिलन प्रधानको पक्षमा चुनाउ प्रचार गर्न पुगेका समाजसेवी माणिक फकीर र मतुवा समुदायका प्रमुख व्यक्तित्व सुकृति रञ्जनलाई नन्दीग्राम स्थित एउटा अतिथिगृहबाट पुलिसले हिरासतमा लिएको हो। यी दुवै प्रमुख नेता हिरासतमा लिएपछि क्षेत्रमा ठूलो खैलाबैला मच्चिएको छ। यद्यपि, पुलिसले उनीहरूलाई कुन मुद्दा वा कारणमा हिरासतमा लिइएको हो भन्नेबारे अहिलेसम्म स्पष्ट पारेको छैन।

पुलिसको उक्त कारबाहीप्रति तीव्र प्रतिक्रिया जनाउँदै माणिक फकीरले नन्दीग्रामका मानिसहरू डराएको र मुख्यमन्त्री शुभेन्दु अधिकारीले जानाजान पुलिसको प्रयोग गरेर उनको चुनाउ प्रचार रोक्न खोजेको आरोप लगाए। उनले स्थानीय मतदातालाई कुनै पनि दबाबमा नपरी दृढ़ताका साथ आफ्नो मताधिकार प्रयोग गर्न अपील गरेका छन्।

त्यस्तै, सुकृति रञ्जनले पनि भाजपामाथि प्रत्यक्ष प्रहार गर्दै आफूहरूलाई जनतामाझ जानबाट रोक्नकै लागि यस्तो गरिएको आरोप लगाए। उनले मंगलवारदेखि नै आफ्नो होटल बाहिर पुलिसको भ्यान तैनाथ गरिएको र बुधवार चुनाउ प्रचारका लागि बाहिर निस्कनेबित्तिकै उनलाई हिरासतमा लिइएको दाबी गरे।

हिन्दुस्थान समाचार / भवानी थामी