ला पाज, ०५ सेप्टेम्बर (हि.स.)। बोलिभियाको राजधानी ला पाजबाट लगभग ३० किलोमिटर टाढा रहेको विआचा शहरमा शुक्रबार एउटा सैन्य ब्यारेकमा भीषण विस्फोट भएको छ। दुर्घटनामा कम्तीमा १० जनाको मृत्यु भएको छ भने ६२ जना घाइते भएको बताइएको छ। स्थानीय अधिकारीहरूका अनुसार, विस्फोट पटेका सामग्री राखिएको क्षेत्रमा भएको हो।
ताइवानको राष्ट्रिय समाचार एजेन्सी सेन्ट्रल न्यूज एजेन्सी (सीएनए) तथा अन्य सञ्चारमाध्यमका रिपोर्टमा अधिकारीहरूलाई उद्धृत गर्दै घटना शुक्रबार दिउँसो करिब २:३० बजी भएको जनाइएको छ। प्रारम्भिक जानकारीअनुसार, रक्षा मन्त्रालयको पटेकाको भण्डारणमा आगलागी भएपछि विस्फोट भएको हो। यद्यपि आगलागी र विस्फोटको वास्तविक कारण भने अझै पत्ता लाग्न सकेको छैन।
विआचाकी स्वास्थ्य निर्देशक रीटा नेब्रास्काले स्थानीय सञ्चारमाध्यमलाई घटनामा मृतकको संख्या १० देखि १५ सम्म पुग्न सक्ने बताएकी छन्। उनले दुर्घटनामा ६२ जना घाइते भएको जानकारी दिइन्। घाइतेमध्ये १४ जनालाई ला पाजका अस्पतालमा पठाइएको छ। उनीहरूमा एक बालिका पनि रहेकी छन्, जसलाई थर्ड-डिग्री बर्न अर्थात् गम्भीर रूपमा जलेको बताइएको छ।
पुलिसका अनुसार, दुर्घटनामा ५० भन्दा बढी मानिस घाइते भएका छन् भने छेउछाउका दर्जनौं घरमा पनि क्षति पुगेको छ। विस्फोटको तीव्रता यति धेरै थियो कि धेरै घरका झ्यालहरू फुटेका छन् र केही भवनमा संरचनागत क्षति पनि पुगेको छ।
घटनापछि सैन्य परिसरमा एम्बुलेन्स, मेडिकल टोली तथा पुलिसकर्मीहरू तैनाथ गरिएको थियो। उद्धारकर्मीहरू घाइतेहरूलाई स्वास्थ्य केन्द्रसम्म पुर्याउन तथा क्षेत्रमा भएको क्षतिको मूल्यांकन गर्न जुटेका थिए।
स्वास्थ्य निर्देशक रीटा नेब्रास्काका अनुसार, दमकलकर्मीहरूले घटनास्थलमा अझै पनि तापको स्रोत रहेको चेताउनी दिएका छन्। यसबाट पुनः विस्फोट हुने खतरा कायम रहेको छ। प्रशासनले सावधानीका रूपमा स्थानीय बासिन्दाहरूलाई घटनास्थलबाट कम्तीमा १५० मिटर टाढा रहन आग्रह गरेको छ। सुरक्षा निकायहरूले अवस्थामाथि निगरानी राखिरहेका छन् र विस्फोटको कारणबारे अनुसन्धान भइरहेको छ।
बोलिभिया दक्षिण अमेरिकाको एक स्थलरुद्ध देश हो, जसको सीमा ब्राजिल, पेरु, चिली, अर्जेन्टिना र पाराग्वेसँग जोडिएको छ।
हिन्दुस्थान समाचार / बिशाल
