काठमाडौं, ०५ सेप्टेम्बर (हि.स.)। नेपालमा आएको विनाशकारी बाढीको १० दिन बितिसक्दा पनि सबैभन्दा बढी प्रभावित रसुवा जिल्लामा रहेको रसुवागढी जलविद्युत् परियोजनाको पावरहाउसको सुरुङमा फसेका कर्मचारीसम्म हालसम्म उद्धार टोली पुग्न सकेको छैन। सुरुङभित्र करिब १२ जना कर्मचारी फसेको आशंका गरिएको छ भने पनियोजनामा काम गर्ने ९३ जना अझै सम्पर्कविहीन रहेको बताइएको छ।
परियोजना व्यवस्थापनका अनुसार, शुक्रबार साँझसम्म पनि उद्धार अभियानका लागि आवश्यक सबै उपकरण परियोजनास्थलसम्म पुर्याउन सकिएको छैन। रसुवागढी हाइड्रोपावर कम्पनीका सम्पर्कविहीन ९३ जना कर्मचारीको खोजी तथा उद्धार अभियान निरन्तर जारी छ।
कम्पनीका अनुसार, सम्पर्कविहीन व्यक्तिहरूमा ५१ जना नियमित कर्मचारी, एक जना सञ्चालक, दुई जना दैनिक ज्यालादारी मजदुर तथा तीन ठेकेदार कम्पनीका ३९ जना कर्मचारी रहेका छन्। पावरहाउसको सुरुङमा फसेका कर्मचारीसम्म पुग्नका लागि सबैभन्दा पहिले सुरुङमा जम्मा भएको हिलो-माटो हटाउन आवश्यक छ।
यसका लागि मिनी एक्स्काभेटर, ३० केभीए डिजेल जेनेरेटर, सबमर्सिबल पम्प र होज पाइपलगायत आवश्यक उपकरणहरू २ अगस्तमै नुवाकोटको मैथली आर्मी क्याम्प, बट्टारमा प्याक गरिएका थिए। यी उपकरणहरू धुन्चेको बाटो हुँदै आयोजनास्थलसम्म पुर्याउने योजना थियो।
नेपाली सेनाको उद्धार टोलीले पावरहाउससम्म पुग्नका लागि क्षेत्रको रेकी गर्दा पावरहाउस नजिक नदीले थप कटान गरेको पाइएको थियो। सेनाका अनुसार, भारी उपकरणसहित ठूलो एमआई-१७ हेलिकप्टर त्यहाँ अवतरण गराउन सम्भव छैन।
त्यसपछि कम क्षमताको र कम तौलको जेनेरेटरको व्यवस्था गरिएको थियो। मिनी एक्स्काभेटर र ठूलो डिजेल जेनेरेटरबाहेक विद्युत्सम्बन्धी अन्य उपकरण तथा आवश्यक सामग्री धुन्चेसम्म पुर्याइसकिएको छ, तर यी सामानहरू अझै धुन्चेमै राखिएका छन्।
पावरहाउस बाहिर बेपत्ता व्यक्तिहरूको खोजी तथा उद्धारका लागि कम्पनीले नेपाल नेसनल माउन्टेन गाइड एसोसिएसनसँग आबद्ध अनुभवी रक क्लाइम्बरहरूको टोलीलाई पनि अभियानमा परिचालन गरेको छ।
कम्पनीले ३ अगस्तमा हिमालय समिट क्लब प्राइभेट लिमिटेडसँग सम्झौता गरेको थियो। यसअन्तर्गत रक क्लाइम्बरहरूलाई घट्टेखोला क्याम्प तथा छेउछाउका उच्च क्षेत्रमा चार दिनका लागि ग्राउन्ड सर्चका लागि परिचालन गरिएको छ। कम्पनीका अनुसार, टोली हाल टिमुरेमा रहेको छ र उसलाई अर्को हेलिकप्टरबाट घट्टेखोला लगेर खोजी अभियान सञ्चालन गर्ने योजना छ।
कम्पनीले कर्मचारी तथा सम्पर्कविहीन कर्मचारीका परिवार र आफन्तलाई उद्धार अभियानको अवस्थाबारे नियमित जानकारी दिन ह्वाट्सएप ग्रुप बनाएको छ। यस ग्रुपमार्फत खोजी तथा उद्धार अभियानका क्रममा प्राप्त हुने जानकारी तथा हालसम्म गरिएका प्रयासबारे जानकारी साझा गरिँदैछ।
कम्पनीका सञ्चालकहरू पनि नियमित रूपमा कार्यालयमा उपस्थित भएर आफन्तहरूलाई अवस्थाबारे जानकारी दिने व्यवस्था गरिरहेका छन्। खोजी तथा उद्धार अभियानका लागि आवश्यक समन्वय गर्ने उद्देश्यले नुवाकोटको बट्टारमा एक जना वरिष्ठ इन्जिनियरसहित दुई जनालाई खटाइएको छ। यसैगरी, रसुवाको धुन्चेमा दुई जना इन्जिनियरलाई तयारी अवस्थामा राखिएको छ।
पावरहाउसमा उद्धार टोलीलाई विद्युत् जडानसम्बन्धी कार्यमा सहयोग गर्न एक जना इलेक्ट्रिकल ओभरसियर पनि खटाइएको छ। कम्पनीका अनुसार, धुन्चेमा नेपाली सेनाको विशेष उद्धार टोली पनि मौसम अनुकूल हुने प्रतीक्षामा रहेको छ। मौसम सफा हुनेबित्तिकै टोली आवश्यक उपकरणसहित पावरहाउस पुगेर उद्धार अभियानमा सहभागी हुनेछ।
बाढी आएको १० दिनपछि पनि सुरुङसम्म पुग्न आइरहेका अवरोधहरूले उद्धार अभियानलाई चुनौतीपूर्ण बनाएको छ। अब सबैको नजर मौसममा सुधार र आवश्यक भारी उपकरणहरू आयोजनास्थलसम्म पुर्याउन सकिने अवस्थातर्फ रहेको छ।
हिन्दुस्थान समाचार / बिशाल
