हो ची मिन्ह सिटी, ९ सेप्टेम्बर (हि.स.)। शीर्ष वरीयताकी भारतीय खेलाडी तन्वी शर्माले बुधबार भियतनाम ओपन २०२६ को महिला एकलको अन्तिम-३२ को खेलमा क्यानडाकी रेचल चेनलाई सोझो सेटमा २१-१६, २१-१७ ले पराजित गर्दै अन्तिम-१६ मा स्थान बनाएकी छन्।

बीएफडब्ल्यू विश्व टुर सुपर १०० प्रतियोगितामा तन्वीले ३६ मिनेटमै खेल आफ्नो पक्षमा पारिन्। भारतीय किशोरीले शुरुदेखि नै खेलमा दबदबा कायम राख्दै लगातार दुई सेट जितिन्।

यस महिनाको शुरुआतमा तन्वी चाइना मास्टर्स २०२६ मा जापानकी विश्व नम्बर-९ टोमोका मियाजाकीसँग ६६ मिनेट चलेको रोमाञ्चक खेलमा १७-२१, २१-१८, १६-२१ ले पराजित हुँदै अन्तिम-१६ बाट बाहिरिएकी थिइन्। त्यसअघि उनले डेनमार्ककी अमाली शुल्जलाई २१-१६, २१-१७ ले हराएकी थिइन्।

गत महिना तन्वीले ताइपे ओपन सुपर ३०० मा आफ्नो पहिलो बीएफडब्ल्यू विश्व टुर उपाधि जितेकी थिइन्। महिला एकलको फाइनलमा उनले भियतनामकी छैटौं वरीयताकी गुयेन थुई लिन्हलाई २१-१६, २१-१६ ले पराजित गरेकी थिइन्। यससँगै उनी सन् २००८ मा साइना नेहवालपछि ताइपे ओपन महिला एकलको उपाधि जित्ने पहिलो भारतीय बनेकी थिइन्।

पार्क ताए-साङको प्रशिक्षणमा खेलिरहेकी तन्वी गत वर्ष यूएस ओपन सुपर ३०० मा उपविजेता बनेकी थिइन्। पार्क ताए-साङ यसअघि पीभी सिन्धुका प्रशिक्षकसमेत रहिसकेका छन्।

भियतनाम ओपनमा बुधबार अर्की भारतीय खेलाडी अनमोल खरबलाई थाइल्यान्डकी सारुनराक वितिदसार्नले २१-१४, २१-१४ ले पराजित गरिन्। यस्तै, आलाप मिश्राले आर्या भविपाठकीलाई २१-८, २१-१४ ले हराए।

हिन्दुस्थान समाचार / बिशाल