गान्तोक, 30 अप्रेल (हि.स.)। सिटिजन एक्सन पार्टी सिक्किमका प्रमुख समन्वयक गणेश कुमार राई लगायत पार्टीका वरिष्ठ नेताहरूले हालैमा सम्पन्न भएको चुनाउमा अटल समर्थनको निम्ति पार्टी उम्मेदवार, कार्यकर्ता र नागरिकहरूप्रति हार्दिक कृतज्ञता व्यक्त गरेका छन्। राईले आज पहिलो दिन तुमिन लिंगी निर्वाचन क्षेत्रको भ्रमण गरि उम्मेदवार ग्याल्पो भोटिया लगायत पार्टी पदाधिकारीहरू र स्थानीय नागरकिहरूसॅंग सामदोङस्थित उनको निवासमा भेट गरे।
सिटिजन एक्सन पार्टीले आज जारी एक प्रेस विज्ञप्तिमा भनेको छ, गणेश कुमार राईको यात्रा सामूहिक कार्य र सहकार्यको भावनालाई प्रतिध्वनि गर्ने पार्टी एकता, समावेशीता र प्रगतिको प्रतिवद्धताको प्रतीक हो। राईले कृतज्ञता व्यक्त गर्दै इमानदारी, पारदर्शिता र दृढ संकल्पका साथ सिक्किमका जनताको सेवा गर्ने पार्टीको समर्पण दोहोऱ्याएको बताइएको छ।
हिन्दुस्थान समाचार/बिशाल