नयॉं दिल्ली, 31 जनवरी (हि.स.)। प्रधानमन्त्री नरेन्द्र मोदीले आज बजेट सत्र शुरु हुनुभन्दा अगाडि सरकार र संसद बजेट सत्रमा देशका अपेक्षाहरू पूरा गर्न सफल बन्नेछ भनी आशा व्यक्त गरेका छन्। उनले यसपटक संसद अधिवेशन अगाडि विदेशबाट अशान्ति गर्ने कुनै प्रयास नभएकोमा पनि आश्चर्य व्यक्त गरे।

बजेट सत्र शुरु हुनुभन्दा अगाडि प्रधानमन्त्री मोदीले परम्परागत रूपमा मिडियालाई सम्बोधन गरे। उनले बजेट सत्रमा सरकार र संसदले देशको आशा र आकांक्षा पूरा गर्ने आशा व्यक्त गरे। साथै, यस बजेट सत्रमा सबै सांसदहरूले विकसित भारतलाई बलियो बनाउन योगदान गर्नेछन् भनी आशा व्यक्त गरे।

प्रधानमन्त्री मोदीले आफ्नो सम्बोधनमा महालक्ष्मीलाई नमन गर्दै र सबैमा धन, सम्पदा र समृद्धिकी देवी लक्ष्मीको आशीर्वादको लागि प्रार्थना गरे। उनले भने, माता लक्ष्मीले हामीलाई सिद्धि, बुद्धि, समृद्धि र कल्याण प्रदान गर्नुहुन्छ। म देशका हरेक गरिब र मध्यम वर्गीय समुदायमाथि देवी लक्ष्मीको विशेष आशीर्वाद रहोस् भनी प्रार्थना गर्दछु।'

आफ्नो तेस्रो कार्यकालको पहिलो पूर्ण बजेटको बारेमा प्रधानमन्त्रीले यो अधिवेशन र बजेटले जनतामा नयाँ विश्वास सिर्जना गर्ने र नयाँ ऊर्जा दिने बताए। उनले विकसित भारतको संकल्प 2047 मा स्वतन्त्रताको 100औं वर्षमा पूरा हुने विश्वास व्यक्त गरे।

आफ्नो सम्बोधनको अन्त्यमा उनले भारतीय राजनीतिमा विदेशी हस्तक्षेपको आलोचना गरे। उनले भने, 'सन् 2014 पछि, यो सम्भवतः संसदको पहिलो सत्र हो जसमा एक वा दुई दिन अघि विदेशबाट आगो लगाउने प्रयास गरिएको छैन। म 2014 देखि हेर्दै आइरहेको छु कि हरेक सत्र अघि मानिसहरू बदमासी गर्न तयार रहन्छन् र यहाँ पनि तिनीहरूलाई समर्थन गर्ने मानिसहरूको कुनै कमी छैन।'

प्रधानमन्त्रीले भने, नवाचार समावेशन र निवेशनिरन्तर हाम्रो आर्थिक गतिविधिको रोडम्यापको आधार रहेको छ। यस सत्रमा, सधैं जस्तै धेरै ऐतिहासिक विधेयकहरूमाथि सदनमा छलफल गरिनेछ र व्यापक मन्थन पछि ती कानूनहरू बन्नेछन् जसले राष्ट्रलाई बलियो बनाउनेछ। विशेष गरी नारी शक्तिको गौरवलाई पुनर्स्थापित गर्न, प्रत्येक महिलाले जात र धर्मको भेदभाव बिना सम्मानजनक जीवन र समान अधिकार प्राप्त गर्न सुनिश्चित गर्न, यस दिशामा यस सत्रमा धेरै महत्त्वपूर्ण निर्णयहरू लिइनेछ।

हिन्दुस्थान समाचार / भवानी थामी