गान्तोक, 01 अक्टोबर (हि.स.)। सिक्किम राज्य सहकारी संघ (सिकन) का अध्यक्ष डा. मंगलजित राईले आज नयाँ दिल्लीस्थित अटल अक्षय ऊर्जा भवनमा भारत सरकारको सहयोग मन्त्रालयका सचिव डा. आशिष कुमार भुटानी, सहसचिव श्रीद्धार्थ जैन, निर्देशक कपिल मीना र अन्य अधिकारीहरूसँग बैठक गरे। बैठक २६, अक्टोबर २०२५ मा गान्तोकमा आयोजना हुने राष्ट्रिय सहकारी सम्मेलनको तयारीमा केन्द्रित थियो, जसको थीम “सहकार से समृद्धि, समृद्धि से सशक्त भारत” रहेको छ।
सम्मेलन सिक्किम राज्य सहकारी संघद्वारा भारत सरकारको सहकारिता मन्त्रालयको तत्वावधानमा सिक्किम सरकारको सहकारिता विभागसँगको सहकार्यमा आयोजना गरिने छ। केन्द्रिय गृहमन्त्री तथा सहकारिता मन्त्री अमित शाह यस कार्यक्रममा प्रमुख अतिथिको रूपमा उपस्थिति रहनेछन्। कार्यक्रमको मिति हालै केन्द्रिय गृहमन्त्री तथा सहकारिता मन्त्रीका पीएसले पुष्टि गरेको विज्ञप्तिमा उल्लेख छ।
यो कार्यक्रम सिक्किमका मुख्यमन्त्री र सिक्किमका सहकारिता मन्त्रीको समग्र मार्गदर्शनमा आयोजना गरिने बताइएको छ। बैठकमा डा. राईले सम्मेलनको लागि प्रारम्भिक रकम विनियोजन गरेकोमा मन्त्रालयप्रति कृतज्ञता व्यक्त गरे, साथै कार्यक्रमको स्तर र राष्ट्रिय महत्त्वलाई ध्यानमा राख्दै थप वित्तीय सहयोगको लागि अनुरोध पनि गरे।
सचिवले सहकारी आन्दोलनलाई सुदृढ पार्न गरिएका प्रतिबद्ध प्रयासहरूको सराहना गर्दै बढाइएको वित्तीय सहयोगको लागि अनुरोधलाई उचित विचार गरिने आश्वासन दिएका छन्।
हिन्दुस्थान समाचार / बिशाल
01 Oct 2025