नयाँ दिल्ली, ५ दिसम्बर (हि.स.)। केन्द्रिय युवा कार्यक्रम तथा खेल मन्त्री डा. मनसुख माण्डवियाले शुक्रबार एफईआई एशियन इक्वेस्ट्रियन (घुड़सवारी) च्याम्पियनशिप २०२५ मा ऐतिहासिक प्रदर्शन गर्ने भारतीय टिमलाई सम्मानित गरे। पटायामा सम्पन्न यो महाद्वीपीय प्रतियोगितामा ६ सदस्यीय भारतीय टोलीले टीम तथा व्यक्तिगत स्पर्धामा कुल ५ पदक जितेर देशका लागि ऐतिहासिक उपलब्धि हासिल गरेका छन्।
इभेन्टिङ स्पर्धामा आशीष लिमयेले व्यक्तिगत इभेन्टमा स्वर्ण पदक र टिम इभेन्टमा रजत पदक प्राप्त गरे।
ड्रेसाज स्पर्धामा श्रुति बोराले उत्कृष्ट प्रदर्शन गर्दै तीन रजत पदक—दुई व्यक्तिगत र एक टिम इभेन्टमा आफ्नो नाममा दर्ता गरिन्। टोलीका अन्य सदस्यहरूमा शशांक सिंह कटारिया र शशांक कनमुडी (इभेन्टिङ) तथा दिव्याकृति सिंह र गौरव पुंडीर (ड्रेसाज) रहेका थिए।
एथलीटहरूलाई सम्मानित गर्दै मन्त्री माण्डवियाले भने, भारतले अब ती खेलहरूमा पनि सफलता हासिल गरिरहेको छ, जहाँ विगतमा विश्वस्तरमा भारतको उपस्थिति अत्यन्तै सीमित थियो। उनले भने,
“यो १० वर्ष पहिलेको भारत होइन। पछिल्लो दशकमा हाम्रो खेल इकोसिस्टममा क्रान्तिकारी परिवर्तन आएको छ। सरकार खेलाडी र पदकको बीचमा आउने हरेक अवरोध हटाउँदै लैजानेछ।” उनका अनुसार, भारतमा इक्वेस्ट्रियन खेलका लागि विश्वस्तरको खेल संरचना बनाइनेछ, जसले गर्दा खेलाडीहरूलाई विदेशमा गएर प्रशिक्षण लिनुपर्ने बाध्यता हट्नेछ।
मन्त्रीले आश्वासन दिंदै भने, सरकारले एक वर्षभित्र देशमा क्वारेन्टाइन सेन्टर स्थापना गर्नेछ, जसले अन्तरराष्ट्रिय प्रतियोगितामा भाग लिन घोडाहरूको आवाजाहीमा लामो समयदेखि देखिएको समस्याको समाधान गर्नेछ।
तीन रजत पदक विजेता श्रुति बोराले मन्त्रीको त्वरित निर्णयको प्रशंसा गर्दै भनिन्, “हामीले हाम्रो चिन्ता साझा गरेपछि उनले तुरुन्तै इक्वाइन डिजिज–फ्री जोन निर्माणका लागि निर्देशन दिए। उनका अनुसार, केही खेलाडीलाई मात्र विदेश पठाउने होइन, सम्पूर्ण इकोसिस्टम तयार गर्नुपर्छ। जब यो व्यवस्था बनेपछि भारतमै प्रशिक्षण, क्वालिफिकेशन र अन्तर्राष्ट्रिय भागीदारी सबै सहज हुनेछ।”
---------------
हिन्दुस्थान समाचार / बिशाल
